«Սև կատու» փնտրելիս․ իշխանությունները փորձում են «սիրուն փաթեթավորմամբ» նոր արհեստական թեմաներ շահարկել. «Փաստ»

«Փաստ» օրաթերթը գրում է

«Վերջին շրջանում ավելի ուժգին տեմպով ու ջանասիրությամբ են հայաստանյան իշխանությունները լծվել բանակի և անվտանգության թեմաների տիրաժավորմանը։ Մասնավորաբար, տարբեր առիթներով առանձնակի ոգևորությամբ ու շեշտադրմամբ անընդհատ խոսում են բանակի ռեֆորմների և «աննախադեպ ձեռբերումների» մասին, մյուս կողմից՝ շարունակաբար թիրախավորում բանակը։ Այս «խաղից» դուրս չի մնացել նաև 44-օրյա պատերազմի հանգամանքներն ուսումնասիրող խորհրդարանական ժամանակավոր հանձնաժողովը, որն այս օրերին կտրուկ «ակտիվացել» է։

Թերթի տեղեկություններով, վերջին օրերին անընդհատ բանակը թիրախավորող գործողությունների, հայտարարությունների ու շրջանառության մեջ դրվող թեզերի ֆոնին (50-ից ավելի զինվորականներ գտնվում են կալանքի տակ, բանակում դավաճաններ են «նշանակվում», «5-րդ շարասյուն» են փնտրում և այլն) քաղաքական որոշում է կայացվել, որ քննիչ հանձնաժողովն ակտիվացնի իր աշխատանքները։ Նախօրեին ականատես եղանք, որ հանձնաժողով էր հրավիրվել ԳՇ նախկին պետ Օնիկ Գասպարյանը: Մեր տեղեկություններով, առաջիկայում ևս մի քանի առանցքային զինվորական նախկին պաշտոնյաներ ևս կհրավիրվեն պարզաբանումներ տալու։

Իշխանություններն այս կերպ փորձում են հերթական անգամ «սիրուն փաթեթավորմամբ» նոր արհեստական թեմաներ շահարկել, հիմքեր ապահովել պատասխանատվությունը բանակի վրա բարդելու և Փաշինյանից հեռացնելու համար, իսկ ընդհանուր առմամբ իմիտացիա ստեղծել, թե լուրջ գործով են զբաղված։ Ինչպես փոխանցում է թերթի խորհրդարանական աղբյուրը, իրականում հանձնաժողովում բավական լճացած և ամորֆ իրավիճակ է, ոչ մի առանցքային ու անկյունաքարային բացահայտումներ պետք չէ սպասել: Ի դեպ, այդ մասին նաև հրավիրված պաշտոնյաներն են քանիցս շեշտել։

Մանրամասները՝ «Փաստ» օրաթերթի այսօրվա համարում: