Հայաստանում հրավառություն կլինի միայն տոն օրերին․ Սիսակ Գաբրիելյանը նախագիծ է ներկայացրել

ՔՊ-ական պատգամավոր Սիսակ Գաբրիելյանը նախագծով առաջարկում է կանոնակարգել հրագործական նյութերի արտադրությունը, ներմուծումն ու առևտրի իրականացման ոլորտը։

Նախագծով համապատասխանեցվում են Հայաստանի տեխկանոնակարգերը ԵԱՏՄ-ի տեխկանոնակարգերին և արգելվում են 3-րդ, 4-րդ և 5-րդ դասի (հրավառությունները) հրագործական արտադրատեսակների ներմուծումը, կիրառումը և վաճառքը։

«Այսինքն՝ եթե հրավառություն կլինի Հայաստանի Հանրապետությունում, ապա դա կա՛մ համայնքային, կա՛մ պետական նշանակության տոն օրերին կլինի։ Իհարկե, իդեալական կլինի, որ այս օրենքի ընդունումից հետո հենց այդպես էլ լինի, որովհետև, ցավոք, ոչ միայն Հայաստանում, այլև բոլոր երկրներում էլ արգելված որոշակի արտադրատեսակների ներքին ապօրինի շրջանառություն է լինում, բայց, կարծում եմ, որ այս օրենքի ընդունումը կհանգեցնի նրան, որ մենք փաստացի կունենանք 90 և ավելի տոկոս նվազում։ Երբ հրավառություն կտեսնենք, պետք է հասկանանք, որ Հայաստանի Հանրապետությունում տոն օր է կամ էլ մեծ միջոցառում է կազմակերպվել պետության կամ համայնքի մասնակցությամբ»,- նշեց Գաբրիելյանը:

Ինչ վերաբերվում է 1-ին և 2-րդ դասի հրագործական արտադրատեսակներին, օրինակ՝ բենգալյան կրակ, պատգամավորը նշեց, որ դրանց ներմուծումը և վաճառքը կշարունակվի, և որևէ սահմանափակում նախատեսված չէ։