Իրավիճակը կրիտիկական է․ եթե տեղումներ չլինեն, ապա էլէներգիայի անջատումների երկարացում կունենանք. Արցախի պետնախարար

Ջրի հետ կապված մենք այսօր ունենք խնդիր՝ բնական պայմաններով պայմանավորված, քանի որ առատ տեղումների բացակայությունը կարող է առաջացնել այդ խնդիրը: Ինչ կապված է խմելու ջրի որակի և դրա անվտանգությանը, ապա պարբերաբար այն հետազոտության է ենթարկվում: Այս փուլում որևէ վտանգավոր նյութեր չենք հայտնաբերել, բնակչությանն անվտանգ խմելու ջուր ամեն դեպքում մատակարարվում է: Այս մասին այսօր տեսակամուրջի ժամանակ հայտարարեց Արցախի Հանրապետության պետական նախարար Գուրգեն Ներսիսյանը:

Պետնախարարի խոսքով՝ ճանապարհը փակելուց հետ ադրբեջանցիների կողմից փորձ արվեց խմելու ջրի հետ խնդիրներ առաջացնել Շուշիի շրջանի՝ Ստեփանակերտից կտրված համայնքների համար, որովհետև կան համայնքներ, որոնք խմելու ջուր ստանում են ներկայումս Ադրբեջանի վերահսկողության տակ գտնվող տարածքից, և ադրբեջանցիները մի քանի անգամ փորձ են արել ուղղակի դադարեցնել խմելու ջրի մատակարարումը: Սակայն, ի վերջո, ռուս խաղաղապահների միջնորդությամբ խնդիրը կարգավորվել է: 

Անդրադառնալով էլէներգիայի մատակարարմանը՝ Ներսիսյանը նշեց. «Ըստ էության էլէներգիայի հետ կապված երկխոսություն այս պահին չկա ադրբեջանցիների հետ: Ինչպես մենք գիտենք, ակնհայտ և բացահայտ փաստ է, որ էլեկտրամատակարարումը խաթարվել է Ադրբեջանի վերահսկողության տակ գտնվող հատվածում, բայց մենք որևէ հասանելիություն տվյալ հատվածին չունենք: Ադրբեջանն էլ բավական տեղեկություն չի տրամադրում խափանման պատճառների՝ արհեստածին կամ բնական լինելու մասին: Թեև մեզ համաև ակնհայտ է և ձեռագիրը պարզ է»:

Պետնախարարի խոսքով՝ նույնը տեղի է ունենում գազամատակարարման հետ կապված: Էլէներգիայի միակ աղբյուրը տեղական արտադրանքն է, որն առավելապես հիմնված է Սարսանգի ջրամբարի հնարավորությունների վրա: Ուստի այն ամբողջությամբ չսպառելու նպատակով Արցախում Էլէներգիայի մատակարարումն իրականացվում է հովհարային անջատումների միջոցով: 

«Արդեն պետք է ասեմ, որ իրավիճակը կրիտիկական է և առաջիկայում առատ տեղումների բացակայության դեպքում մենք կարող ենք ունենալ անջատումների ավելի երկար ժամանակ: Դա էլ իր հերթին հանգեցնելու է նաև ոռոգման հետ կապված խնդիրների առաջացմանը»,- նշեց պետնախարարն ու հավելեց, որ այս ամենը նպատակաուղղված է Ադրբեջանի կողմից, որպեսզի տնտեսության բոլոր ճյուղերը հերթով կաթվածահար անեն: