Լկտի սուտ է․ Սերժ Սարգսյանը՝ Նիկոլ Փաշինյանի՝ զինամթերքի վերաբերյալ հայտարարության մասին

ՀՀ ներկայիս ղեկավարները կարող են առանց ամոթի նշույլի նայել դիմացինի աչքերի մեջ և ստել։ Այս մասին լրագրողների հետ զրույցում ասաց ՀՀ երրորդ նախագահ Սերժ Սարգսյանը՝ մեկնաբանելով Նիկոլ Փաշինյանի այն հայտարարությունը, թե 2018-20 թվականներին ՀՀ-ն ավելի շատ զենք ու զինամթերք է գնել, քան նախորդ 10 տարիներին։

«Իհարկե լկտի սուտ է։ Եվ ընդհանրապես պետք է ասեմ, որ Հայաստանի ներկայիս կառավարիչների ամենաուժեղ կողմը ամոթ չունենալն է։ Նրակք կարող են առանց ամոթի նշույլի նայել դիմացինի աչքերի մեջ և ստել։ Այս առումով ավելացնելու որևէ բան չունեմ։ Իմ կարծիքով նրանք ընդամենը երկու հայտարարություն են արել, որոնցով ղեկավարվել են։ Առաջինն այն էր, որ ասացին՝ իրենք իրենց գժի տեղ կդնեն և Մադրիդյան սկզբունքները «վարի կտան» և այդ սկզբունքներով չեն առաջնորդվի։ Եվ երկրորդը՝ պատերազմի առաջին օրը նրանք հայտարարեցին, որ ինչ էլ լինի, իրենք իրենց պարտվող չեն համարելու։

Այս երկու հայտարարությունները տեսանք թե ինչ արհավիրքներ բերեցին մեր երկրին։ Ինչ վերաբերում է սպառազինություններին, ապա առանց շատ բան բացահայտելու ասեմ հետևյալը, որ իր նշած տարիներին մենք, երևի թե, մարտական պատրաստության վրա ավելի շատ զինամթերք ենք օգտագործել, քան իրենք ձեռք են բերել այդ երկու տարիների ընթացքում։

Ուզում եմ հիշեցնել նրանց, ովքեր կամ անտեղյակ են կամ հիշողության կորուստ են ունեն, որ այդ ժամանակաշրջանում մենք տարածաշրջանում միակն ունեինք Ս-300-ի դիվիզիոններ, մենք ունեինք արդեն մեծ հեռահարության հրթիռներ, մենք այդ ժամանակահատվածում ձեռք ենք բերել 100-ից ավելի ծանր զրահատեխնիկա, հարյուրավոր ժամանակակից հակաօդային պաշտպանության միջոցներ, տասնյակ հազարներով մեծ տրամաչափի զինամթերքներ, 100 միլիոնից ավելի միայն հրազենային զինամթերք։ էլ չեմ խոսում Իսկանդերի ու այլ հզոր զենքերի մասին։ Իսկ իրե՞նք ինչ են ձեռք բերել», - ասաց ՀՀ երրորդ նախագահը։

Նրա խոսքով՝ ներկայիս իշխանությունը ձեռք է բելեր միայն ինքնաթիռներ, որ այդպես էլ օգուտ չտվեցի, ինչպես նաև մի քանի տասնյակ հին, արժեքը կորցրած զինամթերք։

«Փոխանակ վերացական բաներ ասելու, իրենք շատ հանգիստ կարող են ասել՝ իրենք այս 10 կամ 20 տարում այսքանն են ձեռք բերել, մենք՝ այսքանը», - հավելեց Սերժ Սարգսյանը։

Նրա խոսքով՝ գրագետ մարդը, ով տիրապետում է ռամական գործին, շատ լավ գիտի, թե ինչպես կարելի է համեմատել սպառազինություններն ու ռազմամթերքը։

«Ճշմարտությունը հետևյալն էր, որ այդ 2018-20 թվականներին տարեկան կտրվածքով ավելի շատ գումարներ են հատկացվել պաշտպանությանը, բայց արդյո՞ք այդ հատկացված գումարները նպատակային են օգտագործվել, թե մսխվել են։ Մենք շատ ավելի փոքր հնարավորություններ ունեինք զուտ գնումներ կատաելու, բայց մենք նաև մեծ հնարավորություններ ունեինք և այդ հնարավորությունները մինչև վերջ օգտագործել ենք ռազմատեխնիկական աջակցություն ստանալու համար», - եզրափակեց նա։