Տավուշի մարզպետն ու ՌԴ դեսպանը քննարկել են բարեկամական հարաբերությունների ամրապնդման հարցը

Տավուշի մարզպետ Հայկ Ղալումյանը մարտի 24-ին Ռուսաստանի արտակարգ եւ լիազոր դեսպան Սերգեյ Կոպիրկինի հետ քննարկել է Ռուսաստանի եւ Հայաստանի միջեւ միջտարածաշրջանային համագործակցության եւ բարեկամական հարաբերությունների ամրապնդման հարցը։ Քննարկվել են նաեւ փոխշահավետ համագործակցության հեռանկարները։ Այս մասին տեղեկանում ենք Տավուշի մարզպետարանից։

Հանդիպմանը ներկա էին նաեւ փոխմարզպետ Նարեկ Ղուշչյանը, աշխատակազմի ղեկավար Արման Գեւորգյանը, Դիլիջան խոշորացված համայնքի ղեկավար Դավիթ Սարգսյանը եւ պատվիրակության մի շարք անդամներ:

ՀՀ-ում Ռուսաստանի Դաշնության առեւտրային ներկայացուցիչ Աննա Դոնչենկոն խոսեց գործընկերային հարաբերությունների հաստատման մասին, որին մեծապես նպաստում են ցուցահանդեսային եւ տոնավաճառային միջոցառումները, գործունեության կոնկրետ ոլորտին նվիրված թեմատիկ միջոցառումները եւ ընկերությունների ներկայացուցիչների մասնավոր այցերը։

Հայաստանում Ռուսաստանի արտակարգ եւ լիազոր դեսպան Սերգեյ Կոպիրկինը շնորհակալություն հայտնեց հյուրընկալության համար՝ հավելելով, որ մարզեր այցելելն իր աշխատանքի կարեւոր մասն է։ Նա նշեց, որ անհրաժեշտ է պահպանել ու զարգացնել բարեկամական հարաբերությունները։

Դեսպանն այցելեց ԵՊՀ Իջեւանի մասնաճյուղ, որտեղ հանդիպեց ուսանողների եւ Իջեւանի Ռուսական տան կոնտակտային կենտրոնի ղեկավար Մարատ Զուրաբյանի հետ, ով խոսեց Կոնտակտային կենտրոնի գործունեության մասին։

Այնուհետեւ Սերգեյ Կոպիրկինը Իջեւանի Ռուսական կենտրոնում այցելեց ռոբոտաշինության բաց դասին։ Դեսպանը գրքեր նվիրեց ուսանողներին եւ աշակերտներին եւ հաջողություն մաղթեց ուսման մեջ։

Հանդիպման ավարտին ՀՀ-ում ՌԴ առեւտրային ներկայացուցիչ Աննա Դոնչենկոյի հետ շրջայց կատարվեց «Ij Grand Textile» հագուստի ֆաբրիկայում։