Մենք չենք տեսել Անահիտ Մանասյանին որևէ մեկի իրավունքը պաշտպանելիս. հայտնի չէ, խուճապահար փախչում է լրագրողներից, Գլխավոր դատախազի ընկերուհին է. իրավապաշտպան

ՄԻՊ թեկնածու Անահիտ Մանասյանը հայտնի չէ հանրությանը, նա հայտնի դարձավ, երբ նշանակվեց Գլխավոր դատախազի տեղակալ և հետո հայտնի դարձավ լրագրողներին մերժողական կեցվածքով, որը բացասական է ազդում իր հեղինակության վրա: Այս մասին այսօր հրավիրված մամուլի ասուլիսում ասաց «Լրագրողներ հանուն մարդու իրավունքների» իրավապաշտպան կազմակերպության նախագահ Ժաննա Ալեքսանյանը։

«Եթե քեզ չի ճանաչում հանրությանըմ և դու տեղյակ ես այդ մասին, գոնե հանրությանը ներկայացիր, հատկապես երբ թեկնածությունն արդեն առաջադրվել էր և լրագրողներին հետաքրքիր էր կարծիքը, նա ուղղակի խուճապահար փախչում էր: Ես չեմ հասկանում՝ ինչից է ինքը փոխչում, ինչո՞ւ չի կարող երկու բառ խոսել, երբ իր թեկնածությունն արդեն դրված է: Անահիտ Մանասյանին ուզում եմ ասել, որ Մարդու իրավունքների պաշտպանի նշանակումը պաշտոն չի, որ դու գաս և վայելես. ինչպես վայելում են մնացածները՝ նախարարներ և այլն»,- նկատեց իրավապաշտպանը:

Ալեքսանյանը նշեց, որ ինքն անձամբ չի ճանաչում Անահիտ Մանասյանին և ոչ մի վերաբերմունք չունի նրա նկատմամբ՝ ո՛չ բացասական, ո՛չ դրական: 

«Ուղղակի հետևում եմ, թե ինչ թռիչքային, տեղից տեղ պաշտոնների է նա գնում, ասենք, Սահմանադրական հանձնաժողովի անդամ էր, շատերը նույնիսկ չգիտեն այդ մասին, դրանից առաջ եղել է Արդարադատության ակադեմիայի պրոռեկտոր և ամենսոսկալին, իմ կարծիքով, Գլխավոր դատախազի տեղակալի պաշտոնում համաձայնել աշխատելն է, այն բանի համար, որ գլխավոր դատախազի մտերիմ ընկերուհին է: Որևէ մեկը չի հերքել դա, այդ թվում՝ գլխավոր դատախազը»,- նշեց նա:

Ժաննա Ալեքսանյանը համոզմունք հայտնեց, որ տեսնելով համակարգը, որտեղ այս ԽԾԲ-ն է, այս իշխանությունների օրոք, չի կարող այդ հանգամանքը չազդել նրա աշխատանքի վրա, և նույնիսկ այս մի քանի ամիսը, որ Մանասյանն աշխատել է, կարող է կաշկանդել նրան:

Իրավապաշտպանը բերեց Լարիսա Ալավերդյանի օրինակը, երբ վերջինս նշանակվեց ՄԻՊ, մինչ այդ իշխանամետ կեցվածք ուներ Քոչարյանի ժամանակ. «Բայց նշանակումից 10-15 օր աց եղան իարադարձություններ, երբ ինքն իրեն նվիրեց մարդկանց իրավունքների պաշտպանությանը, իշխանությանը դեմ հանդես եկավ: Մենք չենք տեսել Անահիտ Մանասյանին որևէ մեկի իրավունքը պաշտպանելիս, մենք ընդհանրապես չգիտենք՝ ինչ ունակություններ ունի, նա պետք է ներկայանա, եթե հանրությանը չի ներկայանում, ուրեմն խնդիրներ կան»,- ընդգծեց նա: