Ցախավելներն ու աղբահանությունը հորով-մորով արեց, հիմա էլ ավտոպարկն է ուզում շարքից հանել․ Հովհաննես Մանուկյանը նշանակվել է «Երևանի ավտոբուս» ՓԲԸ տնօրեն
NEWSPRESS.am-ի տեղեկություններով՝ «Աղբահանություն և սանիտարական մաքրում» ՊՈԱԿ-ի տնօրեն Հովհաննես Մանուկյանը նշանակվել է «Երևանի ավտոբուս» ՓԲԸ տնօրեն։
Երեկ՝ մարտի 28-ին, նրան որպես տնօրեն ներկայացրել են Ջրվեժի ավտոպարկում։
Նրանց, ում Հովհաննես Մանուկյան անուն-ազգանունը ոչինչ չասաց, առաջարկում ենք կարդալ NEWSPRESS.am-ի հրապարակումները, որտեղ ներկայացված է՝
․թե ինչպես են ՊՈԱԿ-ում մեկը մյուսի հետևից շարքից դուրս եկել աղբահանության ու ջրցան մեքենաները․
․ փաստաթղթերով ներկայացրել ենք նաև, թե ինչպես է ՊՈԱԿ-ի տնօրենը վատնում բյուջեն ու անբարեխիղճ գնումներ անում,
․ հրապարակել ենք տնօրենի «ցախավելային գործարք»-ների մասին, երբ նա մի քանի ամսվա տարբերությամբ 120 հազար հատ ցախավել էր գնել 384 մաքրող բանվորի համար։
Հարկ է նկատել, որ այս պահին էլ, շարքից դուրս գալու հետևանքով, ՊՈԱԿ-ում 7 մեքենա անգործության է մատնված․ դրանք պարզապես չեն աշխատում՝ տնօրինության անփույթ վերաբերմունքի պատճառով։ Մեքենան սարքելու փոխարեն, վարորդներին տուն են ուղարկել և կանչել միայն ժամը 15։00-ին, երբ մյուս մեքենաներն արդեն վերադարձած կլինեն աղբահանությունից։
Մի խոսքով՝ պատկերը տխուր է, և այդ վիճակին ՊՈԱԿ-ը հասել է Հովհաննես Մանուկյանի «ջանքով»։
Ստորև ներկայացված տեսանյութն արվել է նախորդ տարվա սեպտեմբերին, սակայն ոչինչ չի փոխվել դեպի դրական։
Ու ցավն այն է, որ նրա գնալով ՊՈԱԿ-ի վիճակը չի լավանա, քանի որ տնօրենի ժամանակավոր պաշտոնակատար է նշանակվել գործից գլուխ չհանող ուրիշ մեկը՝ ՊՈԱԿ-ի գլխավոր ինժեները։
Ինչ վերաբերում է Հովհաննես Մանուկյանին, ապա աղբահանության ՊՈԱԿ-ը շարքից հանած ու մեքենաները, ըստ շրջանառվող լուրերի, որպես ավտոպահեստամաս վաճառած տնօրենից, ոչ մի լավ բան չես կարող սպասել Երևանի՝ առանց այն էլ «հիվանդ» ու բժշկության կարիք ունեցող ավտոպարկում․․․
Արմինե Մկրտումյան
