Սկսվում է Իգդիր-Նախիջևան խողովակաշարի թուրքական հատվածի շինարարությունը

Շուտով կսկսվի Իգդիր-Նախիջևան խողովակաշարի թուրքական հատվածի շինարարությունը։ Xezerxeber.az-ի փոխանցմամբ՝ այս մասին Twitter-ում գրել է էներգետիկայի նախարար Փարվիզ Շահբազովը։

Այդ կապակցությամբ Բուդապեշտում հանդիպում է կայացել Պ.Շահբազովի և Թուրքիայի էներգետիկայի և բնական պաշարների նախարար Ֆաթիհ Դոնմեզի միջև։

«Իմ սիրելի ընկերոջ, եղբոր և գործընկեր Ֆաթիհ Դոնմեզի հետ մենք գնահատեցինք մեր գործունեությունը այն նախագծերի շուրջ, որոնք կխորացնեն մեր էներգետիկ համագործակցությունը: Շուտով կսկսվի Իգդիր-Նախիջևան գազատարի թուրքական հատվածի շինարարությունը»,-գրել է նախարարը։

Հանդիպմանը քննարկվել են Թուրքիայի տարածքով գազի տարանցման, Հարավային գազային միջանցքի ընդլայնման շրջանակներում «TANAP»-ի հաղորդման կարողությունների ավելացման, «SOCAR»-ի և «BOTAŞ»-ի, TPAO»-ի միջև ածխաջրածնային հանքավայրերի որոնման և արդյունահանման ոլորտում համագործակցության նոր հնարավորություններ։ Քննարկվել է նաև Իգդիր-Նախիջևան խողովակաշարի նախագծի իրականացման ընթացքը։ Հայտարարվել է, որ մոտ ապագայում կսկսվի գազատարի Թուրքիայով անցնող հատվածի շինարարությունը։

Քննարկվել են նաև Նախիջևանում ներդրողների հետ իրականացվելիք հողմային և արևային էներգիայի խոշոր ծրագրերը։ Դիտարկվել է այդ էներգիայի զգալի մասի արտահանումը Թուրքիա, ինչպես նաև այս երկրի միջոցով Եվրոպա «կանաչ էներգիա» մատակարարելու ուղղությամբ ձեռնարկվելիք քայլերը։ Համագործակցության նոր հնարավորությունների իրացման նպատակով նշվել է երկու երկրների միջև էներգետիկայի ոլորտում համապատասխան փաստաթղթի ստորագրման կարևորությունը։

Նշենք, որ Ադրբեջանն ու Թուրքիան Իգդիր-Նախիջևան գազամուղի վերաբերյալ փոխըմբռնման հուշագիր են ստորագրել 2020 թվականի դեկտեմբերի 15-ին։