Ինչո՞վ է պայմանավորված ադրբեջանցիների 100-300մ դեպի ՀՀ մխրճվելու հանգամանքը․ պարզաբանում է Աբրահամյանը

Նախ պետք է հասկանալ, թե իրականում ինչ է տեղի ունենում, որովհետև վերջին երկու օրերին Սյունիքի հետ կապված մի կողմից բավականին հակասական տեղեկատվություն էր, իսկ մյուս կողմից էլ՝ իշխանությունը փորձում էր իրականությունը խեղաթյուրել։ Այս մասին լրագրողների հետ զրույցում ասաց ԱԺ «Պատիվ ունեմ» խմբակցության քարտուղար Տիգրան Աբրահամյանը։

Խոսելով այն մասին, թե ինչ է տեղի ունեցել, Աբրահամյանը նշեց, որ փաստացի ապրիլի 1-ից տեղի է ունենալու Արցախը Հայաստանին կապող ճանապարհի երթուղու փոփոխություն:

«Եթե 44-օրյա պատերազմից հետո Արցախ մուտք ՀՀ-ից Տեղ գյուղից էր, և, բնականաբար, այնտեղ 5 կմ միջանցքային տրամաբանության ներքո ճակատ էր ձևավորված՝ բուֆերային զոնա, որտեղ և՛ ադրբեջանակն կողմը, և՛ հայկական կողմը դիրքեր չունեին։ Ապա, Կոռնիձորով այդ ճանապարհի փոփոխության պայմաններում, Ադրբեջանն այդ ժամկետից 2-3 օր առաջ փաստացի եկել է և մեկնարկային առումով առավելություն ստանալով՝ դիրքավորվել է։ Ինչո՞վ է պայմանավորված սահմանագծի այդ հատվածում 100-300մ տարածքների՝ դեպի ՀՀ մխրճվելու հանգամանքը։ Ես կարծում եմ, որ Ադրբեջանն այստեղ ոչ թե առաջնային խնդիր է դրել 100 կամ 200 մետր մխրճում ապահովելը, այլ Ադրբեջանը եկել, տեղակայվել, դիրքավորվել է այն հատվածներում, որն իր համար բարենպաստ է։ Դա նրան հնարավորություն է տալիս ինչպես մարտական հերթապահության իրականացման, այնպես էլ մարտական այլ խնդիրների իրականացման համար։ Այստեղ ամենամեծ խնդիրներից մեկը նաև այն է, որ Հայաստանի իշխանությունները պարզապես հղում անելով Ադրբեջանի հետ պայմանավորվածություններին, այս դեպքում՝ բանավոր, սպասել են մինչև ապրիլի 1, որպեսզի կարողանան ձևավորել համապատասխան առաջնագիծը»,- նշեց Աբրահամյանը և հավելեց, որ այս ամենն այն դեպքում, երբ Ադրբեջան  իր գրավոր պարտավորությունները չի կատարում, ուր մնաց խոսքը լինի բանավորի մասին։