Անսարքության պատճառով, աղբահանության մեքենան ընկել է շինհրապարակ (կատլավան). վարորդին համոզել են՝ մեղքն իր վրա վերցնել. աղբյուր

Երևանի քաղաքապետարանում, այսօր պաշտոնապես հայտարարեցին «Աղբահանություն և սանիտարական մաքրում» ՊՈԱԿ-ի տնօրեն Հովհաննես Մանուկյանի նոր պաշտոնում նշանակվելու մասին:

 NEWSPRESS.am-ն ավելի վաղ հայտնել էր, որ Մանուկյանը նշանակվել է  «Երևանի ավտոբուս» ՓԲԸ տնօրեն:

Արդեն նշել ենք, որ սա, մեղմ ասած, վտանգավոր որոշում է, հաշվի առնելով այն փաստը, որ Հովհաննես Մանուկյանի պաշտոնավորուման ընթացքում աղբահանության համակարգը շարքից դուրս է եկել, մեքենաներն էլ, անսարքության հետևանքով, պարապուրդի են մատնվել ու վերածվել ավտոպահեստամասերի:

Իհարկե սարսափելի է պատկերացնել, թե ինչ ճակատագիր է սպասվում ավտոպարկին՝ նման անպատասխանատու վերաբերմունքի դեպքում:

Ի դեպ, NEWSPRESS.am-ին հայտնի է դարձել նաև, որ օրերս էլ, իսկ մասնավորապես ուրբաթ օրը՝ մարտի 31-ին, Արաբկիր վարչական շրջանում աղբահանության մեքենան դուրս է եկել երթևեկելի գոտուց ու հայտնվել շինհրապարակում (կատլավանում):

Պարզվել է նաև, որ մեքենայի փոսում հայտնվելու պատճառը եղել է շարքից դուրս եկած արգելակման համակարգը:

Մեքենաների կոճղակների (կալոտկաների) մաշվածության հետևանքով, վարորդների ամեն մի մեքենա նստելը՝ ռիսկային է նրանց կյանքի համար, սակայն տնօրենին դա ընդհանրապես չի հուզել:

Ավելին՝ ըստ մեզ հասած լուրերի, Մանուկյանը աշխատողներին հորդորել է դիմանալ՝ նշելով, որ միևնույնն է՝ մեքենաները 5 տարի ժամկետով են ձեռք բերվել և շուտով նոր մեքենաներ գնելու ժամանակն է:

Սակայն, ինչպես ասում են, «շաբաթն ուրբաթից շուտ եկավ», և նոր վթար եղավ:

Մեքենան, արգելակները չպահելու պատճառով հայտնվել է փոսում, մինչդեռ, ինչպես մեզ հայտնի է դարձել, ՊՈԱԿ-ի ղեկավար կազմը համոզել է վարորդին մեղքն իր վրա վերցնել, որպեսզի ՊՈԱԿ-ի (իրականում իրենց) համար խնդիրներ չառաջանան: Ինչին վարորդը համաձայնել է...

Ի դեպ, մեքենան շատ դժվարությամբ են հանել շինհրապարակից: Մեզ հասած տեղեկություններով, դրա համար օգտագործել են մի քանի տրակտորներ: Դեռ լավ է, որ այս անգամ միայն մեքենան է վնասվել:

Արմինե Մկրտումյան