Ինչպես մեկ հարվածով փոխվեց ողջ քաղաքական դաշտի «ռասկլադը». Նարեկ Մալյան

Իշխանությունը հայտնվել է պատային իրավիճակում: Պատժելը շատ դժվար է, անտեսելը՝ մահացու: Այս մասին ֆեյսբուքյան իր էջում գրել է հասարակական-քաղաքական գործիչ Նարեկ Մալյանը՝ անդրադառնելով «Հայաստան» խմբակցության դաշնակցական պատգամավոր Մհեր Սահակյանի կողմից ՔՊ—ական Վլադիմիր Վարդանյանին հարվածելու դեպքին։ 

Մալյանի գրառումն ամբողջությամբ՝ ստորև․ 

«ՀՅԴ պատգամավոր Մհեր Սահակյանը նույնիսկ չի պատկերացնում, թե քաղաքական ինչ փոփոխությունների սկիզբ դրեց իր մեկ հարվածով առ դեպի իշխանական պատգամավորի ճակատը:

Սկսենք իշխանությունից.

ՔՊ-ական պատգամավորներին տրված են անվտանգության տարրական երաշխիքներ, որոնց դիմաց Փաշինյանը նրանցից ակնկալում է բազմաթիվ մանր մունր ծառայություններ: Կոպիտ ասած, պայմանական լուլուին համոզել են, որ իր անվտանգությանը ոչինչ չի սպառնում, լուլուն կարող է անկաշկանդ լկտիանալ և որևէ մեկը, ով կհամարձակվի ընդդիմանալ լուլուին, խիստ կպատժվի: Ավտանգության այս երաշխիքները իշխանական թիմի ներկայացուցիչներին հատկապես 2021 թվականի ընտրություններին հաջորդող շրջանում լկտիացրեցին: Հանրությունը բազմաթիվ անգամ ականատես է եղել քպականների, նրանց ընտանիքի անդամների լկտի ծաղրին, որոնք որպես կանոն մնացել են անարձագանք:

Իսկ այն հազվադեպ դեպքերում, երբ հանրությունից որևէ մեկը համարձակվել է ընդվզել՝ արժանացել է ցուցադրական պատժի:

Մհեր Սահակյանի դեպքը տարբերվում է: Ցուցադրական պատժի մեխանիզմը դժվար է գործում պատգամավորի կարգավիճակ ունեցողի նկատմամբ: Մանդատից զրկելու գործընթացը կարող է դառնալ (իսկ ես ամեն ինչ կանեմ, որ անպայման դառնա) այն կայծը, որից շատ մեծ հրդեհ կարող է բռնկվել: Մհերին առանց ցուցադրական պատժի իշխանությունը թողնել ուղղակի չի կարող, այլապես կփլվի այն անվտանգության սիստեման, որը հանդիսանում է իշխանության միասնականության հիմնաքարը: Չպատժեն Մհերին՝ կառաջանան բազմաթիվ մհերներ:

Այս պահին իշխանությունը պարտվում է քարոզչական դաշտում, քանի որ ցանկացած շրջանառվող ինֆորմացիա վերջնահաշվարկով դառնում է հօգուտ Մհեր Սահակյանի:

Իշխանության ինֆորմացիայի (սուտ-կիսաճիշտ) բոլոր փորձերը փշրվում են, որովհետև Մհերը վիզուալիզացրեց այն, ինչի մասին երազում է ՀՀ չափահաս և ինտելեկտուալ բնակչության ճնշող մեծամասնությունը:

Իշխանությունը հայտնվել է պատային իրավիճակում: Պատժելը շատ դժվար է, անտեսելը՝ մահացու:

Անցնենք ընդդիմությանը.

Մհերը մի հարվածով միավորեց բոլորին: Իրար ատող տարբեր ընդդիմադիրներ Մհերի հարցում դարձան միակարծիք: Բոլորն աջակցում են Մհերին: Այստեղ կցանկանայի հատուկ դիմել ՀՅԴ-ին և հատկապես երիտասարդ ՀՅԴ-ականներին (մինչև 30 տարեկան): Եթե ՀՅԴ-ն որևէ քաղաքական գործարքի գնա Մհերի հարցում, դա ծանր հարված կլինի Դաշնակցության հեղինակությանը: Պայքարեք Մհերի համար մինչև վերջ:

Երիտասարդներին հատկապես կոչ եմ անում ներքին կուսակցական վերահսկողության տակ վերցնել Մհերի հարցը: Շատ չեմ ծավալվում, բայց բացառեք Մհերի թեմայով ներողություն խնդրողներին ձեր շարքերից, եթե այդպիսիններին կհայտնաբերեք, իսկույն ցուցադրաբար պատժեք՝ ենթարկելով կուսակցական պատասխանատվության:

Մհերին առնչվող բոլոր հարցերում 24/7 ռեժիմով պատրաստ եմ աջակցել իմ ամբողջ ռեսուրսով: Սա այն հարցն է, որը իրոք կարող է թուլացնել դավաճան իշխանությանը և նախօրոք եմ ասում, որ այս թեմայով անվճռական ընդդիմադիրներին սպասվում է ամոթանքի խարան: Սա ասում եմ այսօր, որ հետո նեղացողներ չլինեն:

Մհերը խփել է, մնում է մենք պասը վերցնենք...»։