Ի՞նչ են թաքցնում հակասական «պարզաբանումներով». «Փաստ»
«Փաստ» օրաթերթը գրում է
Փաշինյանի իշխանության նորանոր ներկայացուցիչներ են նետվում ասպարեզ՝ արդարացնելու համար իրենց կողմից Հայաստանի Հանրապետության տարածքի մի մասը թշնամու տրամադրությանը հանձնելու իրողությունը: Իրողություն, որ օրերս, կարելի է ասել՝ «օն-լայն հեռարձակմամբ», արձանագրվեց կոնկրետ Սյունիքի մարզի Տեղ-Կոռնիձոր հատվածում: Երեկ այդ «պարզաբանումային շքերթին» միացավ ԱԺ փոխնախագահի պաշտոնն զբաղեցնող Ռուբեն Ռուբինյանը՝ փորձելով «հեփփիէնդային» մակարոնեղեն կախել հանրության ականջներից:
Ի՞նչն է բնութագրական ու հետաքրքրական միաժամանակ. թե՛ Նիկոլ Փաշինյանի, թե՛ նրա հրահանգները կատարող ԱԱԾ-ի, թե՛ նրա թիմակից Ռուբեն Ռուբինյանի հայտարարությունները, իրենց մանրամասնություններով, հակասում են մեկը մյուսին: Այնուհետև իշխանական կոհորտայի այդ վերինէշելոնային ներկայացուցիչների ասածները, միասին վերցրած, հակասում են Տեղի բնակիչների հայտարարություններին, որ գյուղի վարելահողերն ու այլ տարածքները հեկտարներով տրվել են թշնամու տրամադրության տակ: Առհասարակ, իշխանության, այսպես կոչված, «պարզաբանումները» չեն դիմանում որևէ քննադատության և հակասում են նաև ողջամտությանը:
Ահավասիկ, սկսենք թշնամու կողմից Հայաստանի տարածքի էլի մի հատված օկուպացնելը արդարացնելուն նպատակաուղղված համեմատաբար «թարմ» դրսևորումից, ինչպիսիք, օրինակ՝ Ռուբեն Ռուբինյանի «բացատրություններն» են: Նա, օրինակ՝ ասել է, որ Հայաստանի և Ադրբեջանի ներկայացուցիչների հանդիպումից հետո «էականորեն ավելի լավ իրավիճակ է ստեղծվել դիրքային առումով»: Մեծ հաշվով, ԱԺ փոխնախագահի պաշտոնն զբաղեցնողը կրկնել է իրենց ԱԱԾ-ի երկրորդ հաղորդագրությունը Տեղ-Կոռնիձոր հատվածում ստեղծված իրադրության, պարզ ասած՝ թշնամու առաջխաղացման վերաբերյալ, թե՝ «Տեղ-Կոռնիձոր հատվածում հանդիպում է տեղի ունեցել ՀՀ և ԱՀ ներկայացուցիչների մասնակցությամբ և իրականացվել սահմանի ճշգրտման աշխատանքներ, որի արդյունքում տվյալ հատվածում իրավիճակը էականորեն բարելավվել է»:
Հարց. ի՞նչ է նշանակում այդ արտահայտությունը՝ «իրավիճակն էականորեն բարելավվել է», եթե նախքան այդ նույն ԱԱԾ-ն հայտարարել է, որ թշնամին առնվազն 5 կետերում 100-300 մետր առաջ էր եկել: Այդ «էականորեն բարելավումը» ո՞րն է, էլի: Թշնամին 5 կետից 3-ում հե՞տ է շարժվել, թե՞ այն, որ 300 մետր առաջ էր եկել, հանդիպումից հետո համաձայնել են 5 կամ, ասենք՝ 95 մետր հետ գնալ: Այն, որ բոլ շևիկներն ասում էին՝ մեկ քայլ առաջ, երկու քայլ հետ, այս դեպքում, ոնց որ, հակառակն է՝ երկու քայլ առաջ են գալիս, հետո մեկ քայլ հետը համարում ենք «էական բարելավո՞ւմ»: Թշնամին ներխուժել է Հայաստանի տարածք, այդ տարածքն իրենով է արել, դիրքավորվել է: Ու դա, այնկախ այն բանից, թե ինչ հեքիաթներ են պատմում Նիկոլ Փաշինյանը, նրա այլևայլ ներկայացուցիչները, ներառյալ՝ նրա ԱԱԾ-ն, էականորեն վա՛տ է, շատ վա՛տ: Տեղի է ունեցել ոտնձգություն՝ Հայաստանի ինքնիշխանության նկատմամբ:
Տեղի է ունեցել հանցագործություն: Իսկ անվանապես ՀՀ իշխանություն համարվող բարձրաստիճան պաշտոնյաներն ու պետական հաստատությունները զբաղված են... այդ հանցագործությունը արդարացնելով կամ, ինչ իմանաս, գուցե պարտակելո՞վ: Ավելին, օրինակ, Ռուբեն Ռուբինյանն ասել է, թե Արցախը Հայաստանին կապող այլընտրանքային ճանապարհը ապրիլի 1-ից դադարեց գործել և գործարկվեց նոր ճանապարհը, ու քանի որ «այլընտրանքային ճանապարհը մինչ այս ռուս խաղաղապահների վերահսկողության ներքո էր, սահմանի ՏեղԿոռնիձոր հատվածում ո՛չ Հայաստանի Հանրապետության կողմից, ո՛չ մյուս կողմից դիրքեր չկային, և այդտեղ, բնականաբար, դիրքերի անհրաժեշտություն առաջացավ»:
Այս ի՞նչ դիրքային շիլաշփոթ է: Նիկոլ Փաշինյանը հայտարարել է, թե՝ դիրքային փոփոխություն չի եղել, պարզապես բանակային ստորաբաժանումներին նույն դիրքերում փոխարինել են ԱԱԾ սահմանապահ ուժերը: ԱԱԾ-ն հայտարարել է, թե՝ բանակային դիրքերը բարձունքների վրա են եղել, իսկ սահմանապահ ուժերը պիտի տեղակայվեին սահմանագծով: Իսկ Ռուբեն Ռուբինյանն ասում է, որ դիրքեր ընդհանրապես չեն եղել: Եվ եթե պետության անունից հանդես եկող 3 պաշտոնական աղբյուր ակնհայտ հակասում են միմյանց, ուրեմն, «մի բան այն չէ», իսկ մեր դեպքում՝ ո՛չ մի բան այն չէ: Ավելին, ԱԱԾ մարտի 30-ի հաղորդագրությունից հայտնի է դառնում, որ իրենք թշնամական Ադրբեջանի համապատասխան կառույցի հետ տարբեր կերպ են «ընթերցել» սահմանի որոշման քարտեզները:
Այսինքն, արդեն սահմանագծո՞ւմ է արվել, ու կոնկրետ համաձայնեցո՞ւմ կա, թե Հայաստանի հատկապես որ մասերով է անցնում թշնամական սահմանը: Ավելին, Նիկոլ Փաշինյանի ու նրան ենթակա ԱԱԾ-ի հայտարարություններից ուղղակիորեն բխում է, որ վաղուց թշնամական Ադրբեջանի հետ շփումների մեջ են ու ինչ-ինչ պայմանավորվածություններ են ունեցել կոնկրետ Տեղ-Կոռնիձոր հատվածի վերաբերյալ: Հարց. ե՞րբ էին պատրաստվում Տեղի բնակչությանը շնորհավորել ու աչքալուսանք տալ, որ ադրբեջանական թուրքերին «էստի համեցեք» են արել տեղացիների ցորենի արտեր, Տեղի արոտավայրեր և տարածքներ:
Առհասարակ, պատրաստվո՞ւմ էին որևէ կերպ մարդկանց զգուշացնել, որ թշնամին հենց իրենց արտերի մեջ նոր խրամատներ ու դիրքեր է դնելու, որից հետո մեծ հաջողությամբ արդեն կարող է սպանել, գնդակոծել, առևանգել, գերի վերցնել, իրենց բնույթին համաձայն: Թե՞ ԱԱԾ սահմանապահ ուժերն են խանգարելու թշնամուն, որ իր մշտական սրիկայություններին չդիմի: Լո՞ւրջ: Եվ որտե՞ղ են սահմանապահները տեղակայվելու՝ թշնամու կողմից «թյուրիմացաբար» 300 մետր ավել օկուպացված տարածքո՞ւմ, թե՞ թշնամու կողմից «մեծահոգաբար» այդ պայմանական 300-ից, այսպես ասած, «էականորեն բարելավված», այն է՝ վերադարձրած նորից պայմանական... 92 մետր հատվածում:
ՄԵՍՐՈՊ ՍԱՀԱԿՅԱՆ
Մանրամասները՝ «Փաստ» օրաթերթի այսօրվա համարում
