Նրանք կարող են ցանկացած վարքագիծ թույլ տալ. գիտե՞ք ինչքան վիրավորանքներ լսեցի. Ղազարյանը՝ ՔՊ-ական պատգամավորների մասին

Այն, ինչին մենք հիմա մասնակցում ենք Ազգային ժողովի և Մարդու իրավունքների պաշտպանության և հանրային հարցերի հանձնաժողովի նիստն է, իսկ այդ նիստին առաջին հերթին պետք է մասնակցեն այդ հանձնաժողովի անդամները: Այսինքն՝ ԱԺ կանոնակարգը չի պարտավորեցնում, որ ԱԺ մյուս բոլոր պատգամավորները մասնակցեն բոլոր մշտական հանձնաժողովների նիստերին: Իհարկե իրավունք ունեն, բայց պարտավորություն՝ չունեն: Այս մասին ԱԺ-ում լրագրողների հետ զրույցում ասաց ՀՀ ՄԻՊ թեկնածու Էդգար Ղազարյանը: 

Նրա խոսքով՝ ընդդիմադիր խմբակցությունները 3 ներկայացուցիչ ունեն այս հանձնաժողովում: Մեկը՝ Թովմասյանն է, որը նախագահում է, մյուս երկուը ներկա չեն եղել հիվանդության և երկրից բացակայելու պատճառով:

«Ասում էին՝ պիտի ներկա լինեին պատգամավորները: Ինչո՞ւ պիտի ներկա լինեն: Ներկա էր ՔՊ-ի ավելի մեծ թվով պատգամավորներ, քան հանձնաժողովի անդամներն են: Նշանակում է, որ որոշում են կայացրել՝ հատուկ գալ: Իրենք ինչո՞ւ են հատուկ որոշել գալ, չէ՞ որ ես ինքս էի դիմել՝ մեծ հանդիպում կազմակերպելու համար՝ էլի ԶԼՄ-ների ներկայությամբ, ուղիղ եթերով: Ժամանակի կաշկանդվածություն ունեմ: Կարող եմ խոսել ընդամենը 30 րոպե: Նրանք կարող են ցանկացած վարքագիծ թույլ տալ, ռեպլիկներ, ելույթս ընդհատեն: Պարզվում  է՝ ես դրա իրավունքը չունեմ, քանի որ պատգամավոր չեմ: Եթե ուզում էիք խմբակցությունով գալ, ապա ինչո՞ւ եք եկել հանձնաժողովի նիստում դա անում՝ թատրոնի վերածում: Ընդ որում՝ ես Թատերական գործիչների միության ոսկե մեդալ ունեմ: Ես պարգևատրվել եմ Վայոց ձորի մարզում թատերական գործը զարգացնելու համար, բայց էստեղ ռեալ հավակնորդներ կային դերասանական վարպետության: Գիտե՞ք ինչքան վիրավորանքներ լսեցի»,-նշեց Ղազարյանը: