ԵՄ դիտորդական առաքելությունը դիտարկում ենք Ադրբեջանի ագրեսիվ հավակնությունները սահմանափակող գործոն

Ե՛վ բարեկամական խմբի, ե՛ւ միջխորհրդարանական հարթակներում ձեր աջակցությունը Հայաստանի բարձրաձայնած խնդիրներին չի կարելի թերագնահատել՝ սկսած խմբի անդամների հայտարարություններից մինչեւ խորհրդարանական վեհաժողովներում նախաձեռնած գրավոր հայտարարությունները. ասել է ԱԺ Հայաստան-Շվեդիա բարեկամական խմբի ղեկավար Հռիփսիմե Գրիգորյանն ապրիլի 4-ին Շվեդիա-Հայաստան բարեկամական խմբի ներկայացուցիչների հետ հանդիպման ժամանակ: Տեղեկանում ենք ԱԺ լրատվության վարչությունից։

Հռիփսիմե Գրիգորյանը նշել է, որ Շվեդիան՝ որպես ԵՄ անդամ եւ ներկայում ԵՄ նախագահող երկիր, կարեւոր գործընկեր է Հայաստանի համար: Բարեկամական խմբի ղեկավարը կարեւորել է նաեւ ԵՄ քաղաքացիական դիտորդական առաքելության տեղակայումը: «Մենք առաքելությունը դիտարկում ենք որպես տարածաշրջանում Ադրբեջանի ագրեսիվ հավակնությունները սահմանափակող առանցքային գործոն»,- ասել է նա:

Շվեդիա-Հայաստան բարեկամական խմբի ղեկավար Բյորն Սյոդերը կարեւորել է խորհրդարանական փոխգործակցության զարգացումը եւ հույս հայտնել, որ առաջիկայում երկկողմ հարաբերություններն առավել կընդլայնվեն եւ կզարգանան:

Հայաստան-Շվեդիա բարեկամական խմբի անդամ, ԱԺ մարդու իրավունքների պաշտպանության եւ հանրային հարցերի մշտական հանձնաժողովի նախագահ Թագուհի Թովմասյանը կարեւորել է Հայաստանում ԵՄ քաղաքացիական դիտորդական առաքելության տեղակայումը եւ նշել, որ նման առաքելության առկայությունն Արցախում եւս անհրաժեշտ է: «Դա խնդիրներին տեղում ծանոթանալու եւ իրավիճակը պատկերացնելու հնարավորություն կտա»,- ասել է նա: Պատգամավորն առաջնային է համարել արցախահայության ինքնորոշման իրավունքի ճանաչումը: Հանձնաժողովի նախագահն անդրադարձել է նաեւ փորձագիտական ներուժի զարգացման հարցում Շվեդիայի առաջադեմ փորձի ուսումնասիրման կարեւորությանը:

Բարեկամական խմբի անդամ Զարուհի Բաթոյանը կարեւորել է հետագա համագործակցությունն ու փորձի փոխանակումը, մասնավորապես, կանանց տնտեսական ակտիվությանը, սոցիալական ոլորտի, ինչպես նաեւ երեխաների՝ ընտանիքում ապրելու իրավունքին վերաբերող օրենսդրական կարգավորումների շուրջ:

Բարեկամական խմբի անդամ Իրինա Գասպարյանը, խոսելով Հայաստանում ազգային փոքրամասնությունների իրավունքների մասին, նշել է, որ մեր երկրում ազգային փոքրամասնությունների ներկայացուցիչները որոշ պետական դպրոցներում հնարավորություն ունեն ուսուցանելու իրենց մայրենի լեզուն:

Շվեդիա-Հայաստան բարեկամական խմբի անդամ Լիլիթ Ստեփանյանն էլ անդրադարձել է Հայաստանի անվտանգային խնդիրներին՝ ընդգծելով սահմանամերձ համայնքներում բնակիչների ծանր վիճակը: Նա անդրադարձել է Լեռնային Ղարաբաղի հայ բնակչության ինքնորոշման իրավունքին եւ հետաքրքրվել, թե ինչն է պատճառը, որ ԵՄ անդամ երկրները պատժամիջոցներ չեն կիրառում Ադրբեջանի դեմ:

Շվեդիայի կողմից Հայաստանում իրականացրած ՄԱԿ-ի ծրագրերին է անդրադարձել ԱԺ ֆինանսավարկային եւ բյուջետային հարցերի մշտական հանձնաժողովի նախագահ, բարեկամական խմբի անդամ Գեւորգ Պապոյանը: Նա կարեւորել է մի շարք ոլորտներում փորձի փոխանակումը:

Շվեդիայի խորհրդարանի պատգամավոր, ազգությամբ հայ Արին Կարապետը, կարեւորելով Հայաստանի հետ խորհրդարանական համագործակցությունը, առաջարկել է մշակել համատեղ աշխատանքների շրջանակ՝ միջազգային խորհրդարանական կառույցներում Հայաստանի խնդիրները բարձրաձայնելու եւ լուծումներ գտնելու համար:

Կողմերը կարեւորել են խորհրդարանական կապերի զարգացման անհրաժեշտությունը եւ առաջարկել բարեկամական խմբերի համագործակցությունը դարձնել առարկայական: