Փարիզում կարգելվի էլեկտրական սկուտերների վարձույթը

Փարիզում կարգելվի էլեկտրական սկուտերների վարձույթը:  Կիրակի օրը կայացած քաղաքային հանրաքվեում Ֆրանսիայի մայրաքաղաքի բնակիչների մոտ 90%-ը սատարել է այս նախաձեռնությունը։ Այս մասին փոխանցում է liga.net-ը:

Քվեարկությունը, որին մասնակցել է մոտ 100 հազար մարդ, խորհրդատվական բնույթ է կրել, ուստի որոշումը մնացել է քաղաքային իշխանություններին։

Փարիզի քաղաքապետ Անն Իդալգոն ասել է, որ էլեկտրական սկուտերների վարձույթը կավարտվի սեպտեմբերի 1-ին:

Արգելքի կողմնակիցներն ասում են, որ էլեկտրական սկուտերների վարձակալները «անփույթ թողնում են դրանք» և վտանգավոր իրավիճակներ ստեղծում հետիոտների և տրանսպորտային միջոցների համար:

Արգելքը չի տարածվի անձնական էլեկտրական սկուտերների վրա։

Տեղական լրատվամիջոցների տվյալներով՝ 2022 թվականին Փարիզում էլեկտրական սկուտերների հետ կապված միջադեպերի հետևանքով տուժել է 456 մարդ, 3-ը մահացել է։ Սա զգալիորեն ավելի է, քան 2020 և 2021 թվականներին։ Մասնագետները վնասվածքների հիմնական պատճառներից են անվանում արագ վարելու սիրահարների շրջանում սաղավարտների բացակայությունը։

Ներկայումս Փարիզում կա 15000 էլեկտրական սկուտեր: Միաժամանակ սպառվել է յուրաքանչյուր երրորդ սկուտերի վարձակալության լիցենզիայի ժամկետը։