«Արևիք» ազգային պարկի տարածքում ՊՈԱԿ-ի «Արևիք» մասնաճյուղի աշխատակիցները 500 կաղնի են տնկել

Անցնող շաբաթվա ընթացքում, շրջակա միջավայրի պահպանությանն ուղղված ամենօրյա աշխատանքին զուգահեռ․

Բնապահպանական ծրագրերի իրականացման գրասենյակում

Հնգօրյա այցով Հայաստանում էր Հարմարվողականության հիմնադրամի մշտադիտարկող պատվիրակությունը՝ գրասենյակի կողմից իրականացվող ծրագրերի արդյունքներին ծանոթանալու, հաջողված փորձի վերաբերյալ տեղեկատվություն հավաքագրելու, վերլուծելու, գնահատելու և հիմնադրամի շրջանակներում տարածելու նպատակով։

Հիդրոօդերևութաբանության և մոնիթորինգի կենտրոնում

Երկրաբանի օրվա առիթով Երևանի պետական համալսարանում կազմակերպվել էր հանդիսավոր միջոցառում, որի ժամանակ «ՀՄԿ» ՊՈԱԿ-ի և ԵՊՀ-ի աշխարհագրության և երկրաբանության ֆակուլտետի միջև համագործակցության հուշագիր է կնքվել։

Տնօրեն Լևոն Ազիզյանն ընդունել է ԱՄՆ-ի միջազգային զարգացման գործակալության ֆինանսավորմամբ իրականացվող «Հայաստանի ջրային ռեսուրսների կառավարման բարելավում» ծրագրի տարածաշրջանային բաղադրիչի թիմին։

Ճանաչողական այցի շրջանակում կենտրոնի լաբորատորիայում էին «ԵՄ-ն՝ հանուն երիտասարդների շրջանավարտների ցանց» ծրագրի 2022-2023թթ. Արմավիրի մարզի Էջմիածին համայնքի թիրախային խմբի 13-18 տարեկան երիտասարդները:

«Սևան» ազգային պարկում

ՊՈԱԿ-ի ղեկավարությունը մասնակցել է բնության հատուկ պահպանվող տարածքների հողամասերը վարձակալության և (կամ) կառուցապատման իրավունքով տրամադրելու նպատակով ստեղծված միջգերատեսչական մրցութային հանձնաժողովի քննարկմանը:

Այցելուների կենտրոնը հյուրընկալել է ԳԱԱ հնագետ-ազգագրագետների, մի խումբ զբոսաշրջիկների, ովքեր ծանոթացել են ազգային պարկի ֆլորային, ֆաունային, բնապահպանական առանձնահատկություններին։ #Էկոկրթության շրջանակում անցկացվել է սեմինար-դասընթաց Հ. Իգիթյանի անվան Գեղագիտության ազգային կենտրոնի Սևանի մասնաճյուղի նկարչական բաժնի սաների հետ:

«Խոսրովի անտառ» պետական արգելոցում

Հարմարվողականության հիմնադրամի պատվիրակության անդամները թանգարանում ծանոթացել են արգելոցի բուսական և կենդանական աշխարհին։

Թռչունների պահպանության միջազգային օրվա առիթով թանգարան թեմատիկ այց են ունեցել Արմաշի Մաղաքիա Օրմանյանի անվան միջնակարգ դպրոցի կրտսեր դասարանի սաները:

«Զանգեզուր» կենսոլորտային համալիրում

«Արևիք» ազգային պարկի տարածքում ՊՈԱԿ-ի «Արևիք» մասնաճյուղի աշխատակիցները Տաշտուն համայնքի բնակիչների հետ համատեղ 500 կաղնի են տնկել, որոնք տրամադրվել են «Սոսու պուրակ» արգելավայրի տնկարանի կողմից։

«Շիկահող» մասնաճյուղի աշխատակիցները «Սոսու պուրակ» արգելավայրի տնկարանում մաքրման և խնամքի աշխատանքներ են իրականացրել։

Ավարտվել են «Արևիք» մասնաճյուղի աշխատակիցների և ԲՀՊ տարածքներին հարակից համայնքների բնակիչների համար կազմակերպված առաջին բուժօգնության և անձնական անվտանգության դասընթացները՝ կազմակերպված Ենթակառուցվածքային զարգացման հիմնադրամի հետ համագործակցության շրջանակում։

«Արևիք» ազգային պարկի տարածքում շարունակվում են Մեղրիից Խուստուփ լեռնագագաթ ձգվող արահետի մաքրման և գծանշման աշխատանքները։ Այս փուլում աշխատանքներ են իրականացվել 4 կմ հատվածի վրա։

«Շիկահող» պետական արգելոցի տարածքում իրականացվել են հանդիպող խոշոր կաթնասունների՝ եվրոպական այծյամի, վայրի խոզի, գորշ արջի, գայլի՝ անտառային արահետներով տեղաշարժի ուսումնասիրություններ՝ սեզոնային փոփոխություններն ուսումնասիրելու և համապատասխան հատվածներում անհրաժեշտության դեպքում ֆոտոխցիկներ տեղադրելու նպատակով։

Արգելոցապարկային համալիրում

Ա. Թախտաջյանի անվան բուսաբանական ինստիտուտի գիտաշխատողները և Չեխիայից ժամանած բուսաբանները մոնիթորինգ են իրականացրել՝ ուսումնասիրելով հատկապես «Ջրվեժ» անտառպարկում աճող հիրիկ ցանցավոր և հիրիկ շքեղ տեսակները:

«Էրեբունի» պետական արգելոցում մոնիթորինգի աշխատանքներ են իրականացվել: