«Մանիպուլյացիա է` իբր մեր կատարած աշխատանքները որակով չեն եղել». վարչության պետը` ջարդուփշուր եղած աստիճանների լուսանկարների մասին

Այսօր` ապրիլի 10-ին, Երևանի քաղաքապետարանի գործակարգավարական խորհրդակցության ժամանակ փոխքաղաքապետ Տիգրան Ավինյանը հարց ուղղեց Արամ Մանուկյանի արձանի շուրջ գտնվող հատված Շինարարության և բարեկարգման վարչության պետի պաշտոնակատար Խորեն Գրիգորյանին։

«Հրապարակի վերևի հուշարձանի հետ կապված (նկատի ունի Մետրոյի Հանրապետության հրապարակ կայարանի վերին հատվածում տեղակայված Արամ Մանուկյանի արձանի շրջակայքը-հեղ.)`  ասում են աշխատանքը բավարար որակով չեք արել. դա այդպե՞ս է, թե՞ ոչ»,- հարցրեց Ավինյանը։

Ի պատասխան նրա՝ Խորեն Գրիգորյանն ասաց. «Մանիպուլյացիա է, թե իբր մեր կատարած աշխատանքները որակով չեն եղել, որովհետև այդ հատվածում որևէ շինարարական աշխատանք չի ձեռնարկվել»:

Այսինքն` Խորեն Գրիգորյանը նկատի ուներ, որ այդ տարածքում շինարարություն իրականացնելիս` որոշակի հատված շինաշխատանքներում չի ընդգրկվել։ 

Այլ կերպ ասած` քաղաքապետարանը գործը «կիսատ–պռատ» է արել։

Այս խնդիրն Ավինյանին մտահոգեց այնքանով, որ քաղաքացիները նկարում են չարված հատվածն ու փաստորեն գցում քաղաքապետարանի վարկանիշը։ Նա հանձնարարեց, որ հետագայում, երբ ինչ-որ տեղ շինարարական բարեկարգման աշխատանքներ կատարելիս կլինեն` չբարեկարգված տեղեր չթողնեն։

«Եթե անում ենք, պետք է ամբողջական ու համալիր անենք, որ հետո չստացվի՝ մի հատված արեցինք, մի հատված բաց մնաց: Այս հիշեցումը չի խանգարի, թե չէ ամեն մի տենց տեղում առիթ ենք ստեղծում մարդկանց գնալու և սելֆիներ անելու ջարդված քարերի հետ, որոնք նախագծում ներառված չեն եղել: Իրականում այնպես չէ, որ դա սխալ է, եթե մի գործ անում ենք, պետք է ամբողջական անենք»,- ասաց Ավինյանը։

Նկատենք, որ ֆեյսբուքյան օգտատեր Էդուարդ Հայրումյանը հրապարակել էր լուսանկարներ և կից գրել.

«Հիշո՞ւմ եք մի քանի ամիս առաջ հիմնանորոգված Հանրապետության Հրապարակ կայարանի վերևի հատվածը, որը նաև մշակութային արժեք է հանդիսանում։ Հիշեցի՞ք։

Իսկ հի՞շում եք, որ Երևանի քաղաքապետարանն առաջարկում էր, որ գանք հիանանք: Կարաք չհասնեք ստեղ, էս լուսանկարներով հիացեք։

Բոլոր լուսանկարներն արված են կես ժամ առաջ։

Հ.Գ. Քիչ առաջ զբոսնում էի Հանրապետության Հրապարակի շուրջը, միակ զգացումը, որ մոտս կա՝ դա ամոթի զգացումն է»: