Ադրբեջանը և Թուրքիան, օգտվելով հանգամանքից, իրենց վաղեմի երազանքը կյանքի կոչելու լավ հնարավորություն ունեն. Վանեցյան

«Իրավիճակը մեր տարածաշրջանում իսկապես չափազանց լարված է»։ Այս մասին ասել է «Հայրենիք» կուսակցության նախագահ Արթուր Վանեցյանը` իրանական հեղինակավող «Շարղ» օրաթերթին տված հարցազրույցում։

Նա նշել է, որ Ադրբեջանը և Թուրքիան, օգտվելով այն հանգամանքից, որ աշխարհը զբաղված է Ուկրաինայում և Մերձավոր Արևելքում տեղի ունեցող զարգացումներով, ինչպես նաև ոգևորված 2020թ. 44-օրյա պատերազմում ունեցած ռազմական հաջողություններով, համարում են, որ հիմա թյուրքական պետությունները միմյանց կապելու իրենց վաղեմի երազանքը կյանքի կոչելու լավ հնարավորություն ունեն։

«Անկարան և Բաքուն բավական արդյունավետ դերաբաշխում են իրականացրել՝ Ալիևի վարչակազմը դիմում է ռազմական սադրանքների, որոշակի խնդիրներ լուծում, իսկ հետո Թուրքիան սկսում է արդարացնել ու պաշտպանել Ադրբեջանը Ռուսաստանի, Իրանի և ողջ աշխարհի առջև։ Ցավոք, թուրք-ադրբեջանական այս մարտավարությունը դեռևս աշխատում է և նրանք շարունակում են օր օրի ավելի ամրապնդել իրենց դիրքերը Հարավային Կովկասում»։

Վանեցյանը նշել է նաև, որ համաթյուրքական շահերից զատ, Բաքվի կառավարությունը հանդես է գալիս սեփական օրակարգերն առաջ տանելու նախաձեռնություններով։ Իսկ դա, ըստ Վանեցյանի, առաջին հերթին, ենթադրում է` Արցախի և Սյունիքի հայաթափում։

«Ադրբեջանի իշխանությունները լավ են հասկանում, որ միայն այդ դեպքում իրենց պետությունը կարող է արդյունավետ և կենսունակ լինել։ Եվ քանի դեռ Հայաստանը թուլացած է ու, ըստ էության, գտնվում արտաքին՝ այդ թվում թուրքական շահերի մեծ ազդեցության ներքո, Ադրբեջանը փորձում է օր առաջ լուծել իր անվտանգ ու ինքնաբավ ապագայի խնդիրը։ Այս ճանապարհին բոլոր տեսակ հակազդեցությունները Բաքվի իշխանությունները հաղթահարում են սպառնալիքների ու ուժի գործադրման միջոցով։ Բանը հասել է նրան, որ Ադրբեջանի իշխանությունները չեն զգաստանում անգամ Իրանից հնչող զգուշացումներից»։

Ինչ վերաբերվում է էսկալացիա չլինելու և խաղաղության պայմանագիր ստորագրելու մասին Փաշինյանի հայտարարություններին՝ Արթուր Վանեցյանն ասել է, որ ինքը նման կանխատեսումների հիմքեր չի տեսնում։

«Այսպես կոչված, խաղաղության պայմանագիրն էլ ոչ այլ ինչ է, քան՝ Հայաստանին պարտադրվող հերթական կապիտուլյացիա։ Ես լիահույս եմ, որ կգան ժամանակներ, երբ Հայաստանն իսկապես ի վիճակի կլինի խաղաղության դարաշրջան թևակոխել, բայց դա կլինի արժանապատիվ ու ուժերի հավասարակշռության վրա հիմնված խաղաղություն»,- հավելել է Վանեցյանը։

___________________________________________________

NEWSPRESS.am-ի ֆեյսբուքյան նոր էջին հետևեք այստեղ