Լկտի պահվածքով, ականջ ու լեզու կտրելու սպառնալիքով՝ ներկայացնում եք ՄԻՊ թեկնածուին. Կյուրեղյանը՝ ՔՊ-ականին (տեսանյութ)

Վստահ եմ՝ գիտեք, որ պատգամավորը պարտավոր է հարգալից վերաբերմունք ցուցաբերել քաղաքական ընդդիմախոսների, ԱԺ-ում հարցերի քննարկման մասնակիցների, լրագրողների և բոլոր այն անձանց նկատմամբ, որոնց հետ շփվում է՝ իր լիազորությունները կատարելիս։ ՔՊ-ական պատգամավոր Արթուր Հովհաննիսյանին դիմելով՝ ասաց «Հայաստան» խմբակցության պատգամավոր Արմենուհի Կյուրեղյանը:

Նրա գնահատմամբ՝ ՔՊ-ական պատգամավորի պահվածքը լկտի էր՝ ՄԻՊ հանձնաժողովի նիստի ժամանակ:

Արմենուհի Կյուրեղյանը զավեշտ համարեց այն, որ նման պահվածք ցուցաբերած անձն այսօր ՄԻՊ թեկնածու է ներկայացնում: Նա հարց ուղղեց Արթուր Հովհաննիսյանին, թե ինչպե՞ս է նա ինքն իր պահվածքը գնահատում:

«Հիմա դուք ներկայացնում եք ՄԻ պաշտպանի թեկնածուին, որին ներկայացնելու հարցի քննարկման ժամանակ, որպես պատգամավոր, ձեր պահվածքով շատ հեռու էիք այդ էթիկայի կանոնները պահելուց։ Լկտի պահվածքով, ականջ կտրելու սպառնալիքով՝ դուք ներկայացնում եք մարդու, որը պիտի զբաղվի մարդու իրավունքների պաշտպանությամբ։ Հիմա դուք ինչպե՞ս եք գնահատում ձեր ու ձեր որոշ գործընկերների պահվածքը հանձնաժողովի նիստում»,- ասաց Կյուրեղյանը։

Արձագանքելով՝ Արթուր Հովհաննիսյանը պատասխանեց, որ զավեշտն առաջին հերթին այն էր, թե ում է ընդդիմությունն առաջադրել որպես ՄԻ պաշտպանի թեկնածու։

«Կարծում եմ, որ դուք այս թեմայի մասին ամենաքիչը պետք է խոսեիք։ Իսկ ընդհանուր վիճակը շատ վատ եմ գնահատում։ Պետք էր թույլ չտալ, չտրվել սադրանքներին, էմոցիաներին։ Բայց յուրաքանչյուր դրվագ չպետք է դիտարկել բացառապես նեղ պրիզմայով։ Զուտ շատ կարճ անդրադառնամ․ ընդդիմությունն առաջադրել էր թեկնածուի, որը մեկ անգամ չէ, որ անվանարկել է ՀՀ ժողովրդին։ Դուք ձեր բերանով չեք անվանարկում ժողովրդին, քանի որ դրա պատասխանը տեսել եք, հիմա էլ մարդկանց եք ուղարկում»,- նշեց նա։

Արմենուհի Կյուրեղյանն էլ արձագանքեց՝ ՔՊ-ն ծեծկռտուք էր հրահրում, որ նախկին ծեծկռտուքի տեղը հաներ։

___________________________________________________

NEWSPRESS.am-ի ֆեյսբուքյան նոր էջին հետևեք այստեղ