Եթե Ադրբեջանը ժամանակից շուտ է այդ այլընտրանքային ճանապարհը կառուցել, ապա ինչո՞ւ Հայաստանի իշխանությունները ՀՀ տարածքի հատվածը չեն կառուցել. Օհանյան

«Հայաստան» խմբակցության ղեկավար Սեյրան Օհանյանը տեղեկություն ունի, որ Տեղ գյուղի հարևանությամբ ապրիլի 11-ին արձանագրված ռազմական միջադեպը ծագել է դիրքային ճշգրտումների, ինժեներական կառույցների որոշակի բարելավում իրականացնելու շրջանակներում։ 

Նա լրագրողների հետ զրույցում նկատեց, որ որքան էլ 44-օրյա պատերազմից հետո մենք խոսում ենք Զինված ուժերի մարտունակության անկման մասին, այնուամենայնիվ, որոշ տեղային հատվածներում, զորքերում մեր ստորաբաժանումներն ուղղակի իրենց խնդիրը կատարում են հերոսաբար։ 

Հիշեցնելով, որ 2020 թվականի նոյեմբերի 9-ի փաստաթղթի մեջ գրված է, որ 3 տարվա ընթացքում պետք է ճանապարհի նախագիծ կազմվեր, որից հետո նոր ճանապարհ կառուցվեր՝ Սեյրան Օհանյանն ասաց, որ եթե Ադրբեջանը ժամանակից շուտ է այդ այլընտրանքային ճանապարհը կառուցել, ապա ինչո՞ւ Հայաստանի իշխանությունները ՀՀ տարածքի հատվածը չեն կառուցել:

«Մյուս կողմից էլ հարց է, թե ինչպիսի մակարդակի վրա է գտնվում մեր հարաբերությունները ՌԴ-ի, նաև խաղաղապահ ուժերի հետ, որոնք միջանցքի դիտորդական առաքելություն են իրականացնում: Եթե կար պայմանավորվածություն, որ ապրիլի 1-ին պետք է նոր ճանապարհը պատրաստ լինի, կազմակերպվի ամբողջ երթևեկությունը, և նաև դիրքային փոփոխություններ էին լինելու, ապա հարց է ծագում, թե ի՞նչ գործողություններ էր ծրագրավորել մեր կողմը, ինչո՞ւ ժամանակին չի իրականացվել պլանավորումը և գործողությունների կազմակերպումը»,- հայտարարեց Պաշտպանության նախկին նախարարը։