Զոհված զինծառայողների հարազատները մինչև ժամը 15։00-ն կսպասեն

Երեկվանից 44-օրյա պատերազմում զոհվածների ծնողները Քննչական կոմիտեի դիմաց են։ Նրանք նստացույց են անում և հայտարարելէին, որ 24 ժամ այստեղ են լինելու։

Այսօր` ապրիլի 14–ին, ծնողները հայտարարել են, որ մինչև ժամը 15:00-ին ժամկետ են տվել այդ կառույցին, որպեսզի կատարի իրենց պահանջը։ Նրանք նշել են, որ իրենց պահանջը չկատարելու դեպքում, կձեռնարկեն կտրուկ քայլեր։

Հիշեցնենք, որ նրանք պահանջում են անհապաղ պատասխանատվության ենթարկել այն 12 ոստիկաններին, որոնք փաստացի 2022 թ. սեպտեմբերի 21-ին «Եռաբլուր զինվորական պանթեոնում մարմնական վնասվածքներ են հասցրել ծնողներին։

Նախորդ տարվա սեպտեմբերի 21-ին Եռաբլուր զինվորական պանթեոնում Արցախյան երրորդ պատերազմում զոհված զինծառայողների ծնողների նկատմամբ ոստիկանության ծառայողները բռնություն էին գործադրել։ Այս դեպքով ոստիկանների ու ծնողների միջև առերեսումներ են եղել, սակայն դեռ որևէ մի ոստիկան պատասխանատվության չի ենթարկվել։