22 տարվա հետագիծ. Մայոր Բայրամյանը հիշում է, թե ինչպես է իր հարսանիքին Սպարապետը պարել. (տեսանյութ)

Երբ պահը հասնունանում է` երկար մտածելու ժամանակ չի լինում, գնում ես հայրենիքը թշնամուց փրկելու: Թերևս հենց այս գաղափարախոսությամբ ու այս սկզբունքով էլ Արմեն Բարյամյանը, Տավուշի մարզի Կոթի գյուղի իր դպրոցական ընկերներից շատերի հետ, 1988 թվականի ազատագրական պայքարի ժամանակ կոչվեց հայրենիքը պաշտպանելու սրբագույն պարտականությանը:

Այդ ժամանակ նա ընդամենը 14 տարեկան էր:

Ավելի ուշ Արմենն անդամագրվեց նոր կազմավորված հայոց բանակին: 1994 թվականի հունիսի 13-ը նրա համար դարձավ ճակատագրական:

Դիվերսիոն գործողությունների ժամանակ նա իր հետախույզ ընկերոջ հետ հայտնվում է հակառակորդի ծուղակում: Այստեղ էլ նա հավատարիմ է մնում իր սկզբունքին ու առանց երկար-բարակ մտածելու իր մարմնով փրկում է ընկերոջը:
Ականի պայթունը զրկում է նրան ոտքերից:

Այսօր արդեն մայոր Արմեն Բայրամյանն այդ պատմության մասին երկար չի պատմում: Չի ուզում անդրադառնալ: Ամեն ինչ հետևում է: Թերևս դրան նպաստել է նաև կինը` Լիլիթը, ով Արմենին պատահաբար, կամ նախախնամության շնորհիվ հանդիպեց հենց այն ժամանակ, երբ նա նոր էր զրկվել ոտքերից ու գտնվում էր հիվանդանոցում: Այս հանդիպումից էլ ծնվեց սերն ու դարձավ նրանց ընտանիքի կազմավորման հիմքը:
Նրանց հարսանիքին մասնակցել է նաև Սպարապետ Վազգեն Սարգսյանը:

Արմենի և Լիլիթի սիրո պտուղն էլ նրանց որդին է` Արմանը: Ով այսօր համալրում է հայոց բանակի շարքերը:

Արմեն Բայրամյանն ու իր զինակիցները օրինակ են, թե դպրոցահասակների և թե Վազգեն Սարգսյանի անվան ռազմական ինստիտուտի կուրսանտների համար, որտեղ էլ հենց Բայրամյանը ծառայում է` իր մարտական փորձը փոխանցելով նրանց:

Հայենիքը սիրելու և պաշտպանելու գիտակցումը թերևս այնքան մեծ է, որ Սպարապետի անվան ռազմական ինստիտուտում այսօր ոչ միայն տղաները, այլև աղջիկներն են գալիս սովորելու:
Ջեմմա Դումանյանը մեկն է այն աղջիկներից, որ համալրել է իր ծառայակից տղաների շարքը` գիտակցելով, որ ծառայության է գնում ամբողջ կյանքի համար:
Արմեն Բայրամյանի խոսքով` արդեն երկրորդ տարին է, որ ինստիտուտ են դիմում աղջիկները: Ասում է, որ նույնիսկ նրանցից շատերը տղաներից ավելի առաջադեմ են:

«Եթե մարտի դաշտ ենք ուղարկում զինվորին` առանց պատրաստելու, ուրեմն մենք դավաճանում ենք նրան: Դրա համար մեր ինստիտուտում այս ամենը դրված է բարձր մակարդակի վրա: Մենք մեր կուրսանտներին հավուր պատշաճի պատրաստոմ ենք, և նոր միայն նրանց ուղարկում մարտական խնդիրներ կատարելու»,- ասում է մայոր Բայրամյանը:

Մանրամսաները` տեսանյութում