Թող հանկարծ իշխանությունները չմտածեն, թե հանգիստ, սուսիկ-փուսիկ կարողանալու են Գրիգորի Խաչատուրովի գործը մարսել․ Չախալյանն առաջարկեց փողոցում համախմբվել

«Կամք» Հ/Կ ղեկավար Վահագն Չախալյանը հրավիրված մամուլի ասուլիսում համախմբման կոչ արեց։ 

«Այսօր գեներալ-մայոր Գրիգորի Խաչատուրովի ազատ արձակման հարցը ՀՀ պետականության հետ կապված հարց է։ Բոլորս էլ հասկանում ենք, որ իշխանությունները հայամետ, հայակենտրոն գեներալին չեզոքացնելով՝ թուրք-ադրբեջանական տանդեմին հերթական զոհն են մատուցել։ Սա գաղտնիք չէ ոչ մեկի համար։ Այս օրհասական պահին մեկուսացնելով գեներալին՝ ճանապարհ են բացել ադրբեջանցիների առջև՝ նոր զիջումների համար, ինչպես նաև իշխանության գալուց ի վեր նրանք անզիջում պայքար են մղում զինվորականության դեմ։ Մենք տեսնում ենք, որ բանակից թռածներն ինչպիսի անզիջում պայքար են մղել զինվորականության դեմ։ Ուզում եմ նշել հենց Խաչատուրովների ընտանիքը․ մենք կհիշենք Յուրի Խաչատուրովի, Իգոր Խաչատուրովի հանդեպ քրեական գործերը և այսօր Գրիգորի Խաչատուրովի հանդեպ քրեական գործը»,- ասաց Չախալյանը։

Նրա խոսքով՝ պետք է կազմակերպվել  և անհրաժեշտության դեպքում փողոցում հանրային ճնշում կազմակերպել, փողոցում ակցիաներ կազմակերպել։

«Թող իշխանությունները հանկարծ չմտածեն, թե հանգիստ, սուսիկ-փուսիկ կարողանալու են այս գործը մարսեն»,- ընդգծեց 44-օրյա պատերազմի մասնակիցը։ 

Նա ևս մեկ անգամ համախմբման կոչ արեց բոլոր նրանց, ովքեր հասկանում են, թե ինչ է տեղի ունենում, նրանք, ովքեր հասկանում են, որ սուգը հավերժ է, եթե պայքար չկա, հենց Խաչատուրովի հարցի շուրջ համախմբվել։ Եվ երբ իրենք համախմբվեն, ոչ միայն Գրիգորի Խաչատուրովը կլինի ազատության մեջ, այլև հնարավոր կլինի փոխել հայոց պատմության այս ընթացքը։