«Փաստացի գտնվում ենք պատերազմական իրավիճակում»․ ԱԱԾ նախկին տնօրենը՝ Խաչատուրովին առաջադրած մեղադրանքի մասին (տեսանյութ)
Գեներալ-մայոր Գրիգորի Խաչատուրովի իրավունքների հանրային պաշտպանության նախաձեռնությունը մամուլի ասուլիս է հրավիրել։ Նախաձեռնության պնդմամբ՝ Գրիգորի Խաչատուրովի պաշտպանությունը Հայաստանի յուրաքանչյուր քաղաքացու պարտքն է։ Նախաձեռնությունը կազմված է 12 անդամից, այդ թվում` Տավուշի թեմի առաջնորդ, արքեպիսկոպոս Բագրատ Սրբազան Գալստանյանը, ՀՀ ժողովրդական արտիստ Հրանտ Թոխատյանը, ՀՀ վաստակավոր արտիստ Դավիթ Ամալյանը, Աշխարհի և Եվրոպայի չեմպիոն, ըմբշամարտիկ Արսեն Ջուլֆալակյանը և այլք։ Փետրվարի 21-ին, հիշեցնենք, Գրիգորի Խաչատուրովի նկատմամբ հանրային քրեական հետապնդում է հարուցվել պաշտոնեական դիրքի օգտագործմամբ հանցավոր ճանապարհով ձեռք բերված առանձնապես խոշոր չափերով անշարժ գույքն օրինականացնելու (փողերի լվացման) համար։ Նա ձերբակալվել էր։
Դատախազությունը միջնորդություն էր ներկայացրել նրան կալանավորելու համար։ Սակայն Հակակոռուպցիոն դատարանի դատավոր Տիգրան Դավթյանը մերժել էր միջնորդությունը։ Խաչատուրովը նույն օրը դատարանի դահլիճից ազատ էր արձակվել։
Փետրվարի 24-ին ՀՀ գլխավոր դատախազությունը հատուկ վերանայման բողոք էր ներկայացրել ՀՀ վերաքննիչ քրեական դատարան Գրիգորի Խաչատուրովի նկատմամբ խափանման միջոց կալանքի միջնորդությունը մերժելու որոշման դեմ:
Մարտի 16-ին Վերաքննիչ դատարանը դատախազության բողոքը քննելուց հետո Գրիգորի Խաչատուրովին կալանավորելու որոշում էր կայացրել։
«18 մլն դրամ արժեքով գույքի մասին է խոսքը։ Ինքներդ գնահատեք, արդյո՞ք սա ունի լուրջ հասարակական վտանգավորություն, թե՞ ոչ։ 2024 թվականի հունվարին լրանում է հանցագործության վաղեմության ժամկետը, թե իհարկե այն տեղի է ունեցել։ Սա ևս նվազեցնում է արարքի հասարարական վտանգավորությունը»,- անդրադառնալով մեղադրանքին քիչ առաջ ասաց ԱԱԾ նախկին տնօրեն Միքայել Համբարձումյանը։
«Մեզ մտահոգում է երկրի անվտանգությանը սպառնացող վտանգները։ Փաստացի գտնվում ենք պատերազմական իրավիճակում, երկիրն ունի անվտանգային գլոբալ խնդիրներ, այս խնդիրների հաղթահարման միակ ուղին համախմբումն է։ Իսկ ի՞նչ ենք անում մենք։ Բանակի ղեկավարումից, զինվորական ոլորտից հեռացվում, մեկուսացվում են մարդիկ, ովքեր այդ գործի գիտակներն են։ Անվտանգության ծառայությունից մեկուսացվում են մարդիկ, ովքեր նույնպես այդ գործի գիտակներն են, նույնը կարող եմ ասել ոստիկանության մասին։ Սա լրջագույն խնդիր է», - հավելեց նա։
