Ինչո՞ւ է ընդդիմությունը մասնակցում ԱԺ նիստին, որին ներկա է Փաշինյանը․ Աննա Մկրտչյանի մեկնաբանությունը

Երբ «Դիմադրություն» շարժման փողոցային փուլն ավարտվեց, ինձ բազմիցս հարցրել եք՝ ինչո՞ւ հետ եկաք Ազգային ժողով, ես շատ ուղիղ ու անկեղծ ասել եմ ու հիմա էլ ասում եմ՝ մանդատները պահելու։ Այս մասին այսօր Ազգային ժողովում լրագրողների հետ զրույցում ասաց ԱԺ «Պատիվ ունեմ» խմբակցության պատգամավոր Աննա Մկրտչյանը՝ պատասխանելով հարցին, թե ինչո՞ւ է ընդդիմությունը մասնակցում ԱԺ նիստին, եթե գիտի, թե ինչ է խոսելու Փաշինյանը։ 

Մկրտչյանը նախ նշեց, որ դա իրենց խմբակցության որոշումն է եղել, ապա հավելեց, որ շարունակում է մտածել, որ եթե եկել են մանդատները պահելու, ապա պետք է մասնակցել ամեն ինչին։  

«Եթե եկել ենք մանդատները պահելու, մինչև կարողանանք սրան այստեղից վռնդենք, նշանակում է՝ պետք է մասանակցել ամեն ինչի, պետք է հնարավորություն չտալ, որպեսզի Նիկոլն այստեղ ունենա իր ցանկալի միջավայրը։ Ես կարծում եմ, գոնե առաջին կեսում՝ մինչև փողոց դուրս գալը, ես դրան հասել էի, նույն կերպ շարունակելու եմ հիմա»,- նշեց պատգամավորը։  

Հարց հնչեց, թե ընդդիմությունն ի՞նչու է թույլ տալիս հակահայկական հայտարարություններ հնչեն, որովհետև ընդդիմությունից նաև արմատական գործողությունների են սպասում, ընդհուպ, որ Փաշինյանին թույլ չտան ամբիոնից խոսել։ 

Մկրտչանն ի պատասխան, ասաց, որ համաձայն է լրագրողի հետ և հավելեց՝ կարծում է, որ իրենք այդ ընդդիմությունը դառնալու են։ 

«Լավ հիշեցրիք, ասում է՝ մեր խնդիրն այն է, որ Թուրքիայի իշխանությունները մեզ հավատան։ Այսինքն՝ Հայաստանի ամբողջ արտաքին քաղաքական դիսկուրսը կառուցված է այն բանի վրա, որ մի ահաբեկիչ, մի միջազգային հանցագործ, ով մարդ  է սպանում՝ որ երկրի տարածք մուտք է գործում, ասի, որ մեզ հավատում է, Նիկոլին հավատում է»,- եզրափակեց Մկրտչյանը։