Սովորաբար սխալ են հասկանում. Փաշինյանը՝ Արցախի ԱԺ-ի պատգամավորների մասին

«Ադրբեջանը շարունակում է սադրիչ գործելակերպը և մյուս կողմից էլ ես արձանագրում եմ, որ սադրանքի նպատակը պրոցեսները էսկալացիայի տանելն է»։ ԱԺ–ի միջանցքում պատասխանելով լրագրողների մի քանի հարցերի` հայտարարեց Նիկոլ Փաշինյանը։

Նա շեշտեց, որ, ի պատասխան դրան, հայկական կողմը հանգիստ, քաղաքական գնահատականներով գնալու է առաջ։

Փաշինյանն անդրադարձավ նաև Արցախի խորհրդարանի հայտարարությանը, թե ՀՀ վարչապետը Արցախի ինքնորոշման իրավունքը տարանջատում է անվտանգության հարցերից:

«Եթե հարցի բովանդակությունը խորությամբ չենք ըմբռնում՝ անընդհատ սխալներ ենք գործում և գործել ենք»,-ասաց Փաշինյանը՝ նշելով, որ Արցախի ԱԺ հայտարարություններին հետևում և հարգանքով է վերաբերում:

Հարցին, թե Արցախում իրեն սխա՞լ են հասկացել, Փաշինյանն ասաց, թե սովորաբար սխալ են հասկանում։

«Չի բացառվում, որ այս անգամ էլ են սխալ հասկացել, բայց իմ կարծիքով՝ մեծ հաշվով, սխալ հասկանալու բան էլ չկա, որովհետև իմ գնահատականները շատ հստակ են: Ուզում եմ ուշադրություն հրավիրել հետևյալին, թե փաստարկների դաշտում ինչ հակափաստարկ է հնչել: Ես ասում եմ՝ եկեք գնահատականները մի պահ թողնենք մի կողմ, որովհետև այն, ինչ դուք ասում եք, գնահատականների մեջ որևէ նորություն չկա. սկսած՝ որ դավաճանություն է, սկսած՝ որ դավաճանություն չի. եկեք բովանդակության մեջ խորանանք և տեսնենք` ինչ է նշանակում այդ բովանդակությունը»,–ասաց նա։