Ի՞նչ հեքիաթներ են պատմում, 15 զինվորը քնած մնա՞. ինքն իր 4 երեխաներին գրկած քնում ա, մեր տղերքի գլուխը կերավ. հրդեհից մահացած զինվորների ծնողներ

«Երեք ամիս է՝ ժողովրդին խաբում են։ Հե՞շտ է 15 երեխու գլուխ ուտելը։ Ի՞նչ հեքիաթներ են պատմում, 15 զինվորը քնած մնա՞։ Դիտավորյալ սպանել են երեխաներին և վերջ»: Այս մասին կառավարության շենքի դիմաց ասացին  Ազատ գյուղի զինվորական կացարանում հրդեհի հետևանքով զոհված 15 զինծառայողներ հարազատները։ Նրանք ակցիա են կազմակերպել կառավարության դիմաց ու պահանջում են իրենց ներկայացնել հրդեհի իրական պատճառները։

Ծնողներին զայրացրել է, որ Փաշինյանն ու Պապիկյանը «նպատակահարմար չեն համարում» հանդիպել իրենց հետ։

«Իրենք նպատակահարմար չեն համարում մեզ ընդունել, որովհետև իրենց երեխաները չեն, մեր երեխաներն են, մենք ենք կորցրել, մենք գիտենք՝ ինչ ցավ ենք ապրում։

Այս ի՞նչ անտերություն է, ինչի՞ համար ենք մենք ընդհանրապես երեխա բերում ու տալիս այս պետությանը։ Սա պետություն չէ, բարդակ է»,- ասաց ծնողներից մեկը։

Ծնողները որոշել են մնալ կառավարության շենքի մոտ մինչև իրենց չընդունի Նիկոլ Փաշինյանը։

«Մենք այստեղ կմնանք այնքան, մինչև այդ գերագույն հրամանատար է, գերագույն հորթ է, չեմ վախենում, կասեմ, ինքը մարդ չի, մինչև ինքը մեզ չընդունի։ Չենք գնալու այստեղից, չենք լռելու, ինքը պարտավոր է մեզ ընդունի»,- ասաց զոհված զինծառայողի մայրը։

Նա նաև նշեց. «Իմ ձեռքը կոտրվեր, որ չգնայի, երկու անգամ նրան ընտրեի։ Ինքն իր 4 երեխաներին գրկած քնում է, իսկ մենք 15 ծնողով օր ու գիշեր, արցունքներս աչքերին, նկարի առաջ ենք կանգում ու չգիտենք` ինչ պատասխան տանք։ 15 երեխաներին սպանել են»։