ԵԱ․ Հայ ըմբիշների մրցակիցները

Խորվաթիայի մայրաքաղաք Զագրեբում ապրիլի 21-ին մեկնարկում է հունահռոմեական ոճի ըմբշամարտի Եվրոպայի առաջնությունը, որին Հայաստանը կմասնակցի ամբողջական կազմով: Զագրեբում հանդես կգան Ռուդիկ Մկրտչյանը (55 կգ), Գեւորգ Ղարիբյանը (60 կգ), Հրաչյա Պողոսյանը (63 կգ), Սլավիկ Գալստյանը (67 կգ), Շանթ Խաչատրյանը (72 կգ), Մալխաս Ամոյանը (77 կգ), Սամվել Գրիգորյանը (82 կգ), Վիգեն Նազարյանը (87 կգ), Արթուր Ալեքսանյանը (97 կգ) եւ Դավիթ Օվասապյանը (130 կգ):

Առաջին մրցումային օրը Արմեն Բաբալարյանի գլխավորած թիմից մրցագորգ դուրս կգան Ռուդիկ Մկրտչյանը, Հրաչյա Պողոսյանը, Մալխաս Ամոյանը, Վիգեն Նազարյանն ու Դավիթ Օվասապյանը:

Եվրոպայի բրոնզե մեդալակիր Ռուդիկ Մկրտչյանը (55 կգ) կմեկնարկի քառորդ եզրափակիչից, որտեղ նրա մրցակիցը կլինի Թուրքիայի ներկայացուցիչ Ադեմ Բուրակ Ուզունը:

Մ23 աշխարհի կրկնակի բրոնզե մեդալակիր, Մ23 Եվրոպայի չեմպիոն Հրաչյա Պողոսյանը (63 կգ) նույնպես պայքարը կսկսի քառորդ եզրափակիչից: Նրա մրցակիցը կլինի Աքեր Շմիդ Ալ Օբայդի (Ավստրիա) - Իվան Լիզատովիչ (Խորվաթիա) զույգի հաղթողը:

Աշխարհի ու Եվրոպայի չեմպիոն Մալխաս Ամոյանը (77 կգ) պայքարի մեջ կմտնի 1/8 եզրափակիչից: Մրցակիցը Անտոնինո Կամենյասեւիչ (Խորվաթիա)- Պեր Ալբին Օլոֆսոն (Շվեդիա) զույգի հաղթողն է:

Աշխարհի երիտասարդական չեմպիոն Վիգեն Նազարյանը(87 կգ) որակավորման փուլում ուժերը կչափի աշխարհի բրոնզե մեդալակիր, Եվրոպական խաղերի բրոնզե մեդալակիր, լեհ Արկադիուս Կուլինիչի հետ:

Աշխարհի Մ23 փոխչեմպիոն Դավիթ Օվասապյանը (130 կգ) մեկնարկային 1/8 եզրափակիչում կմրցի գերմանացի Ֆրանց Ռիխտերի հետ: