Պաշտպանության նախարար աշխատող Պապիկյանի կինը փորձել է խաղալ հասարակության հուզականության վրա ու «կերակրել նրանց ելակներով»

Պաշտպանության նախարար Սուրեն Պապիկյանի կինը «սրտաճմլիկ» գրառում է կատարել ամուսնու ծննդյան օրվա առիթով։ Նա հրապարակել է մի քանի աշակերտի «վերջինզանգյան» գրառումներ, որտեղ նրանք իրենց երախտագիտության խոսքերն են հղել Պապիկյանին՝ իրենց պատմության ուսուցչին։ 

Պապիկյանի կինը ներողություն է խնդրել իր ամուսնուց՝ այս նամակները նրանից, իբր թե, «թաքուն» հրապարակելու համար․․․

Իհարկե, միամտություն է կարծել, թե Պապիկյանն իսկապես տեղյակ չէ դրանց հրապարակման մասին։ Բայց սա չէ խնդիրը․․․

Խնդիրն անգամ այն էլ չէ, որ նամակներն ընթերցելիս տպավորություն ես ստանում, թե երեխաներին հանձնարարել են շարադրություն գրել Պապիկյանի մասին։

Հանգիստ թողնենք երեխաներին ու անդրադառնանք այն «մեծերին», ովքեր օգտագործել են այս երեխաների` հուզական վիճակներում արտահայտած միտքն ու աշխատեցրել այն իրենց օգտին՝ փորձելով խաղալ մարդկանց հուզականության վրա։

Պապիկյանի կինն իր գրառման մեջ ամուսնուն նկարագրելիս օգտագործել է «հայրենասեր», «արժեքներ կրող» ու նման որակումներ։ 

Հարց է առաջանում, թե այս ինչ Սուրեն Պապիկյանի մասին է խոսքը․ նրա՞, որ սեփական շահը գերադասում է հայրենիքի շահից, որ կապիտուլյացիայի ու հայրենիքը թշնամուն հանձնելու մեջ մեղադրվող իշխանության մաս է կազմում․․․

Ա՞յն Սուրեն Պապիկյանը, ում աչքի առաջ նոր տարածքներ են հանձնվում թշնամուն․․․

Ա՞յն Պապիկյան Սուրենը, ում օրոք զինվորները մահանում են ամենատարբեր ու կասկածելի վարկածներով և նա չի փորձում բացահայտել, թե ինչու, ինչ պայմաններում և ում մեղավորությամբ մահացան զինվորները․․

Ա՞յն Պապիկյանի, որ թքած ունի երկրի վրա էլ, բանակի վրա էլ, հայրենիքի վրա էլ․․․

Նախարար Պապիկյանի կինը նշել է, նաև, որ աշակերտները գնահատել են Պապիկյանին, հասարակությունը՝ ոչ․․․

Իհարկե, այս հարցում նախարարի կինը մոլորության մեջ է, իհարկե, հասարակությունը ևս գնահատում է․․․

Հասարակությունը գնահատում է Պապիկյանի հարսանեկան ծախսերը, որը մի քանի անգամ գերազանցում էր նրա աշխատավարձը․․․

Հասարակությունը գնահատում է Պապիկյանի ձեռք բերած տունը, որը դարձյալ նույն սկզբունքով ոչ մի կերպ չի տեղավորվում նրա եկամտի մեջ․․․ Մինչդեռ, միևնույն ժամանակ, նրա հանցավոր անգործության հետևանքով զինվորները վառվում են գյուղական հյուղակ հիշեցնող զինվորական կացարանում: 

Հասարակությունը նույն սկզբունքով տեսնում ու հասկանում է, թե ինչպես է Պապիկյանը խուսափում պատասխանատվությունից:

Հասարակությունը տեսնում է, թե ինչպես է բանակը հայտնվել բարձիթողի վիճակում։

Հասարակությունը հասկանում է, որ իշխանության խոստացված «խաղաղությունը», ոչ այլ ինչ է, եթե ոչ հայի ու հայկականի արժեհամակարգի զրոյացում, ոչնչացում ու կորուստ։

Ի վերջո, հասարակությունը տեսնում է, որ վերջին չորս տարում՝ սխալների, թերությունների, բացերի, մեր կործանման համար մեղավոր են բոլոր ՔՊ-ականներն ու մասնավորապես ուժային կառույցի ղեկավարները, ովքեր մատը մատին չեն տալիս՝ իրավիճակը շտկելու համար։

Հասարակությունը շատ բան է տեսնում ու հասկանում, չնայած նրան, որ սուրենպապիկյաններն  ու նրանց կանայք փորձում են խաղալ հասարակության հուզականության վրա ու կերակրել նրանց ելակներով․․․ 

Արմինե Մկրտումյան