Հովհաննես Շահինյանի նկատմամբ իրականացվում է քաղաքական հետապնդում. փաստաբան

Հովհաննես Շահինյանի նկատմամբ իրականցվում է քաղաքական հետապնդում: Այս մասին ֆեյսբուքյան իր էջում գրել է փաստաբան Արսեն Բաբայանը։

«Օպերատիվ ամփոփագիր Հովհաննես Շահինյանի վերաբերյալ թիվ 41-0423 փաստաբանական գործից Օր 7-րդ: Մինչ այս պահը հատկապես շատ կարևոր գործերով ավագ քննիչ Էդգար Կարապետյանի հետ կապ հաստատել չի հաջողվել: «Օպերատիվ-հետախուզական» միջոցառումների շրջանակներում հայտնաբերվել է քննիչի ֆեյսբուքյան էջը, որին ուղարկվել է ընկերության հայտ և հաղորդագրություն՝ «Բարև Ձեզ պարոն Կարապետյան: Ախր արդեն 6 օր եղավ Ձեզ եմ փնտրում» բովանդակությամբ հաղորդագրություն: Մինչ այս պահը ոչ ընկերության հայտն է ընդունել և ոչ էլ կարդացել է հաղորդագրությունը:

Շարունակելով «օպերատիվ-հետախուզական» միջոցառումները՝ հայտնաբերվել է ավագ քննիչ Կարապետյանի բջջային հեռախոսի համարը, որին առավոտվանից կատարված զանգերը նույնպես մնացել են անպատասխան:

Այս ընթացքում ինձ հետ կապ են հաստատել ՄԻՊ աշխատակազմից և հայտնել, որ ես ճիշտ էի բացահայտել քննիչի անձը, նա իսկապես ավագ քննիչ Կարապետյանն է:

Այսօր առավոտյան գրությանս ի պատասխան ստացվել է քննչական կոմիտեի վարչության պետ Շառոյանի գրությունն այն մասին, թե իմ կողմից ներկայացված տեղեկատվությունը բավարար չէ, որպեսզի ասեն, թե ով է Հովհաննես Շահինյանի գործով քննիչը: Այսինքն, ստացվում է, քննչական կոմիտեում փնտրել ու չեն գտել Հովհաննես Շահինյանին վերաբերող վարույթի, որի շրջանակներում կայացվել է ձերբակալության որոշում:

Այս ամենը գալիս է հաստատելու նախապես ունեցածս այն համոզմունքը, որ Հովհաննես Շահինյանի նկատմամբ իրականցվում է քաղաքական հետապնդում:

Որոնողական աշխատանքները շարունակվում են:

Հ․Գ․ Իսկապես արդեն շատ անհագնստանում եմ քննիչի համար, քանի որ նման բան հնարավոր է մի դեպքում, եթե քննիչի հետ անձնական որևէ արտառոց բան է տեղի ունեցել»: