Հայաստանում մի շարք խմիչքների արտադրությունը կազատվի ծանուցման պահանջից

Կառավարությունը գործունեության որոշակի տեսակներով զբաղվելու պարագայում առաջարկում է կրճատել ու պարզեցնել վարչարարությունը, ծանուցման ենթակա գործունեության մի շարք տեսակներով զբաղվող տնտեսվարողներին աջակցել, նպաստել այդ ոլորտների զարգացմանը: Այդ նպատակով առաջարկվում են փոփոխություններ ու լրացումներ «Գործունեության իրականացման ծանուցման մասին» ու «Պետական տուրքի մասին» օրենքներում:

Փոխնախարարը տեղեկացրել է, որ, մասնավորապես, խոսքը վերաբերում է անասնաբուժության բնագավառում օգտագործվող կիսապատրաստուքների, բույսերի պաշտպանության քիմիական եւ կենսաբանական միջոցների արտադրությանը կամ վաճառքին, ինչպես նաեւ անասնաբուժասանիտարական փորձաքննությանը:

Ըստ Անի Իսպիրյանի` վերջին տարիներին վերոնշյալ ոլորտներում գործունեություն ծավալելու համար ընդհանրապես դիմողներ չեն եղել:

Պարտադիր ծանուցման ցանկից կհանվեն նաեւ 100 հազար լիտրից ավելի շշալցված կոնյակի իրացման եւ ներմուծման գործունեությամբ զբաղվելու համար ծանուցման պահանջը եւ համապատասխան պետական տուրքի վճարման անհրաժեշտությունը:

Միավորվել են վիսկիների, ռոմի, ջինի, սպիրտային և այլ թուրմերի ու մինչև 22 տոկոս սպիրտ պարունակող այլ սպիրտային խմիչքների արտադրության գործունեության տեսակները, դրանցով զբաղվելու իրավունք ձեռք բերելու համար սահմանվել է 3 մլն դրամ տարեկան պետական տուրք, որն անհամեմատ քիչ է նախկին սահմանաչափից: