Փաշինյանին «դավաճան» ասողը գործից է զրկվել, չասողը՝ թասիբից

2018 թվականին ընդդիմադիր պատգամավոր Նիկոլ Փաշինյանին Հայաստանի վարչապետ ընտրած, ապա 44-օրյա պատերազմին մասնակցած Հայաստանի հանրապետության քաղաքացի Սամվել Վարդանյանի համար 2023 թվականին իր ընտրած ղեկավարը համարվում է ոչ ավել, ոչ պակաս «դավաճան»։

Վարդանյանը դա չի թաքցրել իր հոգու խորքում։ Նա համարձակվել է իր սխալ ընտրության մասին բարձրաձայնել։ Երեկ երեկոյան տեսել է Փաշինյանին և գոռացել է «դավաճան», ինչի համար երեկոյան տարվել է ոստիկանություն, իսկ այսօր՝ ազատվել աշխատանքից։

«Շատ տհաճ խոսակցություն եմ ունեցել գործատուիս հետ, ինքը համաձայն չէր իմ ասածի հետ, ինձ ասաց՝ այդ արարքիցս հետո նույնիսկ հյուրանոց ոտք չպետք է դնեի, այդտեղ ես ադմինիստրատոր էի աշխատում: Ասաց, որ սխալ եմ, ո՞նց եմ ընտրված նախագահին բան ասում և այլն: Մեր տհաճ խոսակցությունից երկուստեք հասկացանք՝ այդ աշխատանքն այլեւս անհնար է: Իրենք կուսակցական չեն, բայց խնդիրն այն է, որ իրենք հասկացան, որ խնդիրներ կունենան իմ նման աշխատող ունենալու դեպքում»,- Aravot.am-ին պատմել է Սամվել Վարդանյանը:

Սամվելը դարձել է Հայաստանի հանրապետության այն քաղաքացին, ով գտել է իր մեջ ուժ բղավելու իր սխալ ընտրության մասին, առաջինը ինքն իրեն, ապա հանրությանը խոստովանելու, որ 2018 թվականի իշխանափոխությունը Արցախը հանձնելու համար է եղել։

Սամվելը առաջինը ինքը իրեն է խոստովանել, որ Արցախի հողը պաշտպանելու համար հազարավոր հայորդիներ այսօր Եռաբլուրում անմահացել են, որովհետև ինքը սխալվել է՝ հավատալով Փաշինյանին։

Սամվելի պես ամեն օր ինքնախոստովանություն անող մեր հայրենակիցները շատ են։

Նրանց թիվը ավելանում է, նրանք դա կիսաձայն խոստովանում են իրենց, երբ թշնամին բռի մեջ սեղմում է Արցախը, խոստովանում են, երբ տեսնում են, թե ինչպես է գծվում 120 հազար հայի հայրենազրկելու և ցեղասպանելու գծագիրը, խոստովանում են, երբ տեսնում են, թե ինչպես է թշնամին հասնում Ջերմուկ, ապան Սիսիան, հետո սպանում ԶՊՄԿ-ի աշխատակցին։

Բայց ինչն է խանգարում, որ Սամվել Վարդանյանի պես այդ ինքնախոստովանությունը միայն կիսաձայն չլինի, մարդիկ ունենան քաջություն ու այդ մասին բղավեն Սամվելի պես, խոստովանեն, որ մեղավոր են թուրք-ադրբեջանական շահերի սպասարկու իշխանության ձեռքը Հայաստանը և Արցախը գերի դարձնելու համար ու որոշեն, որ պետք է ուղղեն սխալը։

Սամվել Վարդանյանը այդ համարձակության սիմվոլն է՝ անկախ ցանկացած հանգամանքից։

Եթե վախենում եք ձեր գործատուներից, ապա Վարդանյանի օրինակը ցույց է տալիս, որ ազատվելով աշխատանքից X գործատուի մոտից, նա այն կգտնի Y-ի մոտ։

Սամվելը անհաց չի մնա, կգտնի և աշխատանք և հոգու խաղաղություն, իսկ ի՞նչ կունենանք դուք՝ Փաշինյան ընտրածներ ու դրա համար երկու ձեռքով ձեր գլխին հարվածողներ, վստահաբար ոչ հոգու խաղաղություն, գուցե միայն փող։

                                                  NEWSPRESS.am