Լաչինի միջանցքում տեղի ունեցող իրադարձությունների պատասխանատվությունը կրում է ՌԴ-ն. ԱԽ քարտուղար

Լաչինի միջանցքում տեղի ունեցող բոլոր իրադարձությունների պատասխանատվությունը ՌԴ-ինն է։ Այդ մասին Հանրայինի Հարցազրույց ժամանակ հայտարարել է ՀՀ ԱԽ քարտուղար Արմեն Գրիգորյանը։

«2020 թվականի նոյեմբերի 9-ի եռակողմ հայտարարության համաձայն՝ Լաչինի միջանցքը պատկանում է Ռուսաստանի Դաշնությանը, և այնտեղ են գտնվում ռուս խաղաղապահները։ Տեղի ունեցող բոլոր իրադարձությունների պատասխանատվությունը կրում է ՌԴ-ն»,- նշել է նա։

Քարտուղարի խոսքով՝ Ռուսաստանի Դաշնությունը պետք է գործի, որպեսզի Լեռնային Ղարաբաղում ապրող 120 հազար հայերը էթնիկ զտման չենթարկվեն․ «Որովհետև այդ գործողությունների միակ նպատակը միանշանակ Լեռնային Ղարաբաղում էթնիկ զտումն է։ Այդ մասին խոսում է ադրբեջանական հանրությունը, այդ թվում՝ պաշտոնական մակարդակով՝ վերջնագրեր ներկայացնելով Լեռնային Ղարաբաղում ապրող հայերին»,- ընդգծել է նա։

«Մենք բազմիցս հարցրել ենք մեր ռուս գործընկերներին, թե ինչու է նման իրավիճակ ստեղծվել։ Դա տեղի է ունեցել բազմիցս՝ Խծաբերդ, Փառուխ, Լաչինի միջանցքի արգելափակում դեկտեմբերի սկզբից, հիմա կամրջի մոտ։ Այդ գործողություններն այլևս միջադեպեր չեն, այլ իրականություն են»։

Նա հիշեցրել է, որ 2020 թվականին ռուս խաղաղապահներն Արցախի բնակիչներին անվտանգության երաշխիքներ են խոստացել։ Արցախի բնակիչները վերադարձել են՝ նույնպես ականջալուր լինելով այդ երաշխիքներին։ Բայց էթնիկ զտումների սպառնալիքը գնալով ավելի առարկայական է դառնում։

Գրիգորյանը կեղծ է անվանել ընդդիմության այն մեղադրանքները, թե տեղի ունեցածի համար մեղավոր են Հայաստանի իշխանությունները, որոնք սխալ են կառուցել հարաբերությունները Ռուսաստանի հետ: ԱԽ քարտուղարը նաև հայտարարել է, որ Ղարաբաղում միշտ եղել են ռուսամետ տրամադրություններ, իսկ Հայաստանը չի փոխել արտաքին քաղաքականության վեկտորը․

«Հայաստանի համար շատ կարևոր է, որ հայերն ապրեն Լեռնային Ղարաբաղում, և այնտեղ լինեն իրավունքների և անվտանգության երաշխիքներ։ Դրա համար բազմաթիվ քայլեր են արվում», - ասել է Գրիգորյանը։

Նա խոստովանել է, որ Ադրբեջանը փորձում է ուժով մղել խաղաղության համաձայնագրի իր համար շահավետ պայմանները։ Հայաստանը, գտնվելով ծանր վիճակում, փորձում է անվտանգության նոր երաշխիքներ գտնել։