Եղիշե Կիրակոսյանը Եվրադատարանում խոստովանել է՝ պետությունն ընդունում է իր մեղքը․ մահացած զինվորների մայրերը՝ որդիների գործի բացահայտման մասին (տեսանյութ)

Կառավարությունում արդեն տեղյակ են ու գլխավոր դատախազ Աննա Վարդապետյանն էլ արդեն հայտարարել է՝ խաղաղ պայմաններում մահացած 5 զինվորի մահվան գործերում նշված տեղեկություններն իրականությանը չեն համապատասխանում։ 

Այդ մասին NEWSPRESS.am-ի հետ զրույցում ասացին զինվորների մայրերը, որոնց Վարդապետյանի «խոստովանությունը» հույս էր ներշնչել։ Դատախազն ԱԺ ամբիոնից հայտարարել էր, որ մայրերի բողոքը ճիշտ է՝ նրանք գործում նշված մահով չեն մահացել։ Այժմ ծնողները եկել էին կառավարության մոտ՝ պահանջելու վերաորակավորել գործերը։

Մյուս կողմից էլ, սակայն, մեծ հույսեր չեն կապում տեղի իշխանության հետ ու հույսը դրել են Եվրոպական դատարանի վրա։

«Եղիշե Կիրակոսյանը (Միջազգային իրավական հարցերով ներկայացուցիչ-խմբ․) Եվրոպական դատարանում հայտարարեց, որ իրենք ընդունում են իրենց մեղքը։ Ասաց՝ մենք ընդունում ենք մեր մեղքը։ Այսինքն՝ պետությունն ընդունել է իր մեղքը, որ 15 տարի իրավապահ մարմիններն օրենքը խախտելով, սխալ ուղղությամբ են տարել գործը, բայց այսօր չեն ուզում վերաորակավորել գործը»,- մեզ հետ զրույցում ասաց Տիգրան Օհանջանյանի մայրը՝ Գոհար Սարգսյանը։

Ի դեպ, մեր զրույցի պահին, մոտեցավ Եղիշե Կիրակոսյանը, ով արագ մի երկու բառ փոխանակեց Գոհար Սարգսյանի հետ և հեռացավ։

Մանրամասները՝ NEWSPRESS.am-ի տեսանյութում։