Հանձնվել ու գնալ դժվար ճանապարհով. ինչ է առաջարկում Ֆրանսիան Հայաստանին

Ադրբեջանի արտգործնախարար Ջեյհուն Բայրամովի հետ համատեղ մամուլի ասուլիսի ժամանակ Ֆրանսիայի Եվրոպայի և արտաքին գործերի նախարար Կատրին Կոլոնան կոչ է արել Հայաստանին և Ադրբեջանին խաղաղության պայմանագրի կնքման գնալ։

«Ադրբեջանի և Հայաստանի միջև խաղաղության հնարավորություն կա:
Մենք կոչ ենք արել միջազգային հանրությանը խուսափել բախումներից, հակամարտությունը պետք է լուծվի խաղաղ ճանապարհով, և դա կայուն և հաստատուկ խաղաղության ճանապարհն է, այս ժողովուրդներն այսօր ունեն խաղաղության հնարավորություն։ Ադրբեջանը հանդես է եկել խաղաղության պայմանագրի ստորագրման նախաձեռնությամբ, իսկ Ֆրանսիան ողջունել է դա։

Սա դժվար ճանապարհ է, խաղաղության ճանապարհը պահանջում է համբերություն, հաստատակամություն, թիմային աշխատանք և ծրագրեր։ Պրահայի հանդիպմանը պայմանավորվածություն է ձեռք բերվել, եղել են շփումներ, և սա կարևոր է։ Ադրբեջանն ու Հայաստանը պետք է ճանաչեն միմյանց տարածքային ամբողջականությունն ու ինքնիշխանությունը, և սա է ամեն ինչի հիմքը։

Խաղաղության համաձայնագիր կնքելու համար անհրաժեշտ է գնալ այս դժվարին ճանապարհով»-Բաքվում ասել է ֆրանսիացի պաշտոնյան։

Այն, որ Ադրբեջանը Հայաստանին առաջարկում է խաղաղության պայմանագիր, դա պարզ էր նախքան ֆրանսիացի պաշտոնյայի այս ելույթը, որովհետև Հայաստանին այն ներկայացրել է Ադրբեջանը։

Ադրբեջանը Հայաստանին պարտադրում է խաղաղություն, բայց իր պայմաններով, իսկ այդ պայմաները մի քանիսն են՝ Արցախից ամբողջական հրաժարում, Հայաստանի 8 գյուղերի հանձնում Ադրբեջանին, Արցախի Պաշտպանության բանակի լուծարում։
Սրանք պահանջներից մի քանիսն են ու հիմնականը։

Մեր բարեկամ Ֆրանսիան մեզ հիմա ինչո՞ւ է կոչ անում ընդունել ադրբեջանական առաջարկները, գնալ այդ դժվարին ճանապարհով։
Ադրբեջանը Արցախում ապրող հայերին առաջարկում է կամ ադրբեջանական անձնագիր, կամ միակողմանի բացված ճանապարհով Արցախից հեռացում։

Ֆրանսիացի պաշտոնյան ադրբեջանական այս պահանջը դատապարտելու փոխարեն ինչու է Հայաստանին առաջարկում է հնազանդորեն ընտրել հանձնվելու ճանապարհը։
Հարց է առաջանում, թե ֆրանս-ադբեջանական ինչ գործարքներ են դրված պաշտոնյայի այս հայտարարության հիմքում։

Իրականում ինչպես Ֆրանսիան, այնպես էլ ԱՄՆ-ն, կամ աշխարհաքաղաքական այլ կենտրոն չի առաջնորդվում հայկական շահով, նրանց օրակարգերի կիզակետում դրված է իրենց երկրների շահը։ Այդ շահը առաջ տանելու համար, եթե Ֆրանսային պետք լինի ջանքեր գործադրել, որ հայերը հանձնվեն, ապա Ֆրանսիան դա կանի։ Բաքվում ֆրանսիաից նախարարի հայտարարությունը հենց այդ մասին է։

                                                          NEWSPRESS.am