Ցավոտ քայլին գնում են էտապներով՝ ըստ պայմանավորվածության

Այսօր ԱՄՆ պետքարտուղար էնթոնի Բլինկենի մասնակցությամբ կայացել է Հայաստանի և Ադրբեջանի Արտաքին գործերի նախարարների հանդիպումը, որից հետո ծրագրավորված է Միրզոյան-Բայրամով երկկողմ հանդիպում։

Կարելի է ենթադրել, որ հայ-ադրբեջանական խաղաղության պայմանագրի ստորագրման գործընթացը Միրզոյան-Բայրամով հանդիպումով թևակոխում է ավարտական փուլ, քանի որ դրան խոչընդոտող գործոնները մինիմալիզացվել են և Հայաստանի վարչապետ Փաշինյանը Ազգային ժողովում հայտարարել է, որ Արցախը պետք է ճանաչել Ադրբեջանի կազմում։

Նիկոլ Փաշինյանի այս հայտարարությանը հետևեց Ադրբեջանի կողմից Հակարիի կամրջի վրա անցակետի տեղադրումը և Արցախի ամբողջական շրջափակումը։

Թե քանի փուլանի պայմանավորվածությունների կգնա Արարատ Միրզոյանը Բայրամովի հետ, հայտնի կդառնան ավելի ուշ, երբ պարզ դառնա, թե Սյունիքով միջանցքի և Հայաստանում գտնվող անկլավները Ադրբեջանին հանձնելու հարցով ինչ պայմանավովածություններ են ձեռք բերվել։

Մինչ դրանց հասնելը այս փուլում ակնհայտ է Արցախի շուրջ զարգացումների ավարտը։

Պարզ է դառնում, որ Հայաստանի իշխանության կցորդը Արցախում՝ Արայիկ Հարությունյանը միանում է Արցախը Ադրբեջանին ինտեգրելու գործընթացին, հասարակությանը կամաց-կամաց ընտելացնում են այդ գաղափարին։ Այդ նպատակին էր ծառայում Հակարիի անցակետում երեկվա կատարվածը։

Ինչ կատարվեց Հակարիի կամրջին։

Պետք է հատուկ ուշադրություն հրավիրել նրա վրա, որ Գորիսից Ստեփանակերտ ճանապարհին՝ մինչև Հակարի գետի վրա ապօրինաբար տեղակայված ադրբեջանական հսկիչ-անձնագրային կետը, կանգնած են Հայաստանի հանրապետության Ազգային անվտանգության ծառայության ծառայողները և ոստիկաններ Արցախից։

Պարզից էլ պարզ է, որ և Հայաստանի ԱԱԾ ծառայողները և ոստիկանները տեղյակ են եղել զարգացումների մասին։ Հայ վարորդները չէին կարող հասնել ադրբեջանական անցակետին՝ առանց հայկական կողմի գիտության։

Պարզ է նաև, որ Հայաստանի ԱԱԾ ծառայողների կողմից թույլտվություն է եղել Հակարիի կամուրջ հասնելու համար, իսկ թույլտվությունը առանց Հայաստանի վարչապետի գիտության և համաձայնության չի եղել։

Այս թույլտվությունը խոսում է մի բանի մասին՝ գործ ունենք Հայաստան-Ադրբեջան երկկողմ պայմանավորվածության հետ և Ադրբեջանի պահանջները լիարժեք բավարարելու օպերացիայի հետ։

                                                         NEWSPRESS.am