«Շիրակացի» ճեմարանի պատուհանից երեխայի ցած ընկնելու փաստով նախաձեռնվել է քրեական վարույթ. Գոռ Աբրահամյան

Երևան քաղաքի Արտեմ Միկոյան փողոցում գործող Շիրակացու Ճեմարանի 4-րդ հարկից 13-ամյա երեխայի ցած ընկնելու և վնասվածքներով «Սուրբ Աստվածամայր» ԲԿ տեղափոխվելու դեպքի առթիվ ՀՀ քննչական կոմիտեի ԵՔՔՎ Ավան և Նոր Նորք վարչական շրջաննների քննչական բաժնում նախաձեռնվել է քրեական վարույթ ՀՀ քրեական օրենսգրքի 162-րդ հոդվածի 2-րդ մասի 2-րդ կետի (անչափահասին ինքնասպանության հասցնելու) հատկանիշներով։ Այս մասին հայտնում է Քննչական կոմիտեի խոսնակ Գոռ Աբրահամյանը։

«Վարույթի շրջանակներում կատարվել է դեպքի վայրի զննություն, նշանակվել է դատաբժշկական փորձաքննություն, իրականացվում են հարցաքննություններ։

Դասասենյակի լուսամուտից ցած ընկած երեխայի հետ դեռևս քննչական գործողություններ չեն իրականացվել՝ հաշվի առնելով նրա առողջական վիճակը։

Անհրաժեշտ գործողությունները կատարվում են՝ կատարվածի հանգամանքները լիարժեք բացահայտելու համար։

ՀՀ քննչական կոմիտեն էական փաստական տվյալներ ձեռք բերելու դեպքում, թույլատրելիության սահմաններում, դեպքի վերաբերյալ տեղեկատվություն կտրամադրի հանրությանը։

Սակայն հարկ եմ համարում սոցիալական ցանցերի օգտատերերին, լրատվամիջոցների իմ գործընկերներին հիշեցնել, որ դեպքը վերաբերում է անչափահասի և ուսումնական հաստատության։ Անչափահասներին վերաբերող քրեական վարույթներն ունեն քննության էական առանձնահատկություններ։

Եվ ելնելով երեխայի լավագույն շահից՝ հորդորում եմ զգուշորեն մոտենալ խնդրին՝ ինչպես բուժհաստատությունում գտնվող երեխային, այնպես էլ նրա ծնողներին, ինչպես նաև Ճեմարանի մյուս սաներին, նրա համադասարնցիներին նոր, ավելորդ սթրեսների, հոգեկան տառապանքների չենթարկելու համար»,-նշել է նա։