Տվել են 3 ձեռք, ասել են՝ ձեր որդունն է, տարեք, հուղարկավորեք․ Թագուհի Թովմասյանը զարհnւրելի մանրամասներ հայտնեց 44-օրյա պատերազմի մասնակիցների հարազատների հետ հանդիպումից

Շատ ծանր խոսակցություն էր գնում ներսում, որովհետև մենք գործ ունենք այնպիսի իրողությունների հետ, որ պատկան մարմինները մարդկանց տվել են 3 ձեռք, ասել են՝ ձեր որդին է, տարեք հուղարկավորեք։ Այս մասին այսօր լրագրողների հետ զրույցում ասաց Մարդու իրավունքների պաշտպանության և հանրային հարցերի մշտական հանձնաժողովի նախագահ Թագուհի Թովմասյանը, ում նախաձեռնությամբ այսօր կազմակերպվել էր հանդիպում 2020 թվականի 44-օրյա պատերազմում գերեվարված ու անհետ կորած զինվորների ծնողների հետ։

«Մի ծնողի դեպքում 1,82 հասակ ունի, 43 համարի կոշիկ է հագնում, բայց իրեն տվել են 1,60 հասակով ԴՆԹ նույնականացման տվյալներ և ասում են՝ դուք պետք է հարմարվեք այդ իրավիճակի հետ, ձեր երեխան է և նա հագել է շատ ավելի փոքր չափի կոշիկ, քան իր որդու ոտքի չափն է եղել։ Այսինքն՝ տեղի են ունենում իրադարձություններ նույնականացման դաշտում, որ ուղղակի սյուրռեալիզմի դրսևորում է և ողբերգություն է պատերազմից 2,5-3 տարի հետո ծնողներին այսպիսի իրավիճակում թողնելը։ Ծնողներ կան, որոնք ահռելի հետաքննական աշխատանք են կատարել, փաստեր են հավաքել իրենց որդիների գտնվելու վայրի, զոհվելու կամ ոչ զոհվելու, գերի ընկնելու հանգամանքների մասին, և այդ տվյալները, երբ նույնացնում են և ամփոփում, ստացվում է, որ նրանք առնվազն չհաստատված գերիների ցանկում պիստի լինեն, բայց որևէ կերպ այդ գերիները չեն հաստատվում։ Իրենք շատ վրդովված էին, որ իշխանության տարբեր ներկայացուցնիչներ խոսում են ընդամենը 33 գերեվարված քաղաքացիների մասին կամ զինծառայողներ այն դեպքում, երբ իրականում շատ ավելին են գերիները։ Ծնողներն ունեն փաստեր, թե ինչպես են իրենց որդիները գերեվարվել»,- հանդիպումից մանրամասներ հայտնեց պատգամավորը։ 

Նա նշեց, որ զինծառայողների հարազատներն ամենաշատը դժգոհում են այն բանից, որ պատկան մարմինները ոչինչ չեն անում կամ չեն անում բավարար աշխատանք, որպեսզի իրենց երեխաները վերադառնան, կամ իրենց երեխաների մարմինները պատշաճ հանձնվեն իրենց։