Իմ ընկերներն արյուն չեն թափել, որ այսօր երկրի գերագույն գլխավոր հրամանատարը հայտարարի, որ թշնամին որտեղ ուզենա, կարող է ինչ ուզի անի. Արման Ստեփանյան

«Նախքան ջոկատի հրամանատար դառնալը, երկու տարի ծառայել եմ, եղել եմ գումարտակի մոտոհրաձգային զինվոր, պահել եմ մարտական դիրքեր և երբևիցե չեմ լսել նման հրաման, որ հակառակորդի ոտնձգությունների դեպքում պատասխան կրակ չի կարելի տալ»: Այս մասին ասուլիսի ժամանակ ասաց «Սևքարեցի Սաքո» ռազմա-հայրենասիրական ՀԿ ֆիդային մահապարտների ջոկատի հրամանատար Ռաֆայել Քոչարյանը՝ հավելելով, որ այն ժամանակ ադրբեջանցիները վախենում էին հայի վրա նույնիսկ հրացան պահել:

Ասուլիսին ներկա «Եղնիկների» Արծիվներ ռազմա-հայրենասիրական ՀԿ նախագահ Արման Ստեփանյանն էլ կոչ արեց բոլորին միանալ՝ երկրի անվտանգությունը փրկելու համար:

«Ես երկու պատերազմ անցած ուղի ունեմ: Շատ բաներ եմ տեսել: Բայց իմ ընկերներն արյուն չեն թափել, որ այսօր երկրի գերագույն գլխավոր հրամանատարը հայտարարի, որ թշնամին որտեղ ուզենա, կարող է ինչ ուզի անի: Դա մենք թույլ չենք տալու», - հրավիրված ասուլիսի ժամանակ ասաց Արման Ստեփանյանը:

«Սևքարեցի Սաքո» ռազմա-հայրենասիրական ՀԿ ֆիդային մահապարտների ջոկատի հրամանատարի տեղակալ Աշոտ Խաչատրյանն էլ ավելացրեց, որ 90-ականներից մասնակցել է բոլոր պատերազմներին:

«Երբևիցե նման փակուղային վիճակ չենք տեսել, քանի որ էն ժամանակ Վազգեն Սարգսյան ունեինք, որը երբեք նման բան թույլ չէր տա»,- ասաց նա: