Արցախն ընդամենը դարպաս է դեպի Հայաստան. նոր, ծանր իրադարձություներ են սպասվում. Տիգրան Աբրահամյան

Մեծ հաշվով, Վաշինգտոնում տեղի ունեցած բանակցություններն, ըստ էության, արձանագրումների ձևով ցույց տվեցին, որ որևէ արդյունք չի եղել, որքան էլ ամերիկյան կողմը փորձում էր որոշակի դրական ֆոն ստեղծել այդ բանակցությունների և դրա արդյունքի շուրջ։ Այս մասին այսօր՝ մայիսի 8-ին, Հակակոռուպցիոն դատարանի դիմաց այսօր լրագրողների հետ զրույցում ասաց ԱԺ «Պատիվ ունեմ» խմբակցության քարտուղար Տիգրան Աբրահամյանը:

«Իրականում դրան հաջորդած ժամանակահատվածում Թուրքիայից, Ադրբեջանից և Հայաստանի իշխանություններից հնչեցրած մեկնաբանությունները ցույց են տալիս, որ ոչ միայն ոչ մի արդյունք չի եղել բանակցություններում, ավելին՝ կողմերը որոշակի զգուշությամբ խոսում էին նոր, հնարավոր անկանխատեսելի իրադարձությունների մասին»,- ասաց պատգամավորը։

Նրա խոսքով՝ աստացի, այսօր ունենք մի իրավիճակ, երբ Ադրբեջանը Հայաստանի գլխին իջեցրել է բավականին մաքսիմալիստական օրակարգ, որը ենթադրում է, որ Արցախի հանձնումն Ադրբեջանին, իսկ Նիկոլ Փաշինյանն ինքը մի քանի օր առաջ խոսում էր այն մասին, որ իրենց առաջարկած՝ նույնիսկ ինքնավարությունն Ադրբեջանը չի ընդունում․ ինքնավարությունը, որը ենթադրում է Ադրբեջանի կազմում որոշակի կարգավորումներ։

«Ադրբեջանի ներկայացրած մյուս պահանջները վերաբերում են, Արցախից բացի, նաև Հայաստանի Հանրապետությանը, առաջին հերթին՝ Ադրբեջանի օկուպացված տարածքների լեգիտիմացմանը և վերաբերում են նաև նոր տարածքային պահանջներին, որը չի սահմանափակվում 8 գյուղերով։ Վերջին օրերին բավականին ակտիվ նաև միջանցքի թեման է շրջանառվում և Ադրբեջանը չի էլ փորձում թաքցնել, որ դրան հասնելու է ցանկացած գնով, այսինքն՝ անկախ նրանից, թե քաղաքական շփումների հետևանքով կամ արդյունքում հնարավոր կլինի հասնել որևէ լուծման, Ադրբեջանը պատրաստ է դրան հասնել նաև ուժի կիրառման միջոցով։ Ադրբեջանի այս պահանջների աճը նաև ցույց է տալիս այն արտաքին քաղաքականության տապալումները, ինչ ունեցել է Հայաստանի իշխանությունը, որովհետև եթե մինչև այդ փորձում էին հանրությանը հրամցնել, թե Արցախի հանձնմամբ Հայասատնի անվտանգության խնդիրն ենք լուծում, կյանքը ժամանակը, պատմությունը ցույց տվեց, որ Արցախն ընդամենը դարպաս է դեպի Հայաստան, և միայն Արցախի հարցով փաստացի Ադրբեջանը չի փորձելու սահմանափակվել»,- ընդգծեց Աբրահամյանը։

Պատգամավորը նկատեց, որ առաջիկայում, ցավոք, մեզ սպասվում են նոր, ծանր իրադարձություններ և «ցավալիորեն պետք է արձանագրենք, որ Հայաստանի այս իշխանությունը չունի համապատասխան կամք ոչ միայն արտաքին այս անվտանգային մարտահրավերներին դիմակայելու, այլև իր քայլերով ավելի բարենպաստ դաշտ է ձևավորում ադրբեջանական ագրեսիայի համար»։