Ձեր հոդվածից հետո աշխատակիցներ եմ ուղարկել. Մալաթիա-Սեբաստիա վարչական շրջանից արձագանքել են NEWSPRESS.am-ի հրապարակմանը

Մալաթիա-Սեբաստիա վարչական շրջանի Անդրանիկի 54 հասցեում կա բարեկարգման ծրագիր, կա նախագիծ, որով իրականացվում է տարածքի բարեկարգում: Այս մասին NEWSPRESS.am-ի հետ զրույցում ասաց Մալաթիա-Սեբաստիա վարչական շրջանի ղեկավարի տեղակալ Անդրանիկ Ավետիսյանը՝ արձագանքելով մեր կայքում հրապարակված «Բարեկարգում են, ձեռքի հետ էլ` յուրացնում. Մալաթիա-Սեբաստիայի հանրային այգուն կից ապօրինաշինություն է իրականացվում» վերտառությամբ հոդվածին:

Բնակիչներն ահազանգել էին, որ Անդրանիկ 54 հասցեում տեղակայված հանրային օգտագործման այգին ինչ-որ անհատներ փորձում են ապօրինի յուրացնել։

«Տարածքը, որը բնակիչների կողմից մատնանշվել է, և ասել են, որ այդտեղ ապօրինաշինություն է կատարվում՝ մեր նախագծում ներառված չէ»,-պարզաբանեց Անդրանիկ Ավետիսյանը:

Անդրադառնալով բնակիչների դիտարկմանը, թե ապօրինաշինություն իրականացնող անձը ինչ-որ կերպ կապ ունի վարչական շրջանի ղեկավարի հետ, ում թույլտվությամբ էլ հենց իրականացվում է յուրացումը, Անդրանիկ Ավետիսյանը նշեց, որ հիշյալ տարածքի «զավթումը» վաղեմի պատմություն ունի: 

«Տվյալ տարածքը ցանկապատված է, այսպես ասած, զավթված է, որն ունի տարիների վաղեմության պատմություն»,- ասաց Անդրանիկ Ավետիսյանը՝ մեզ ցույց տալով հարևանների տեղը, ովքեր, նրա խոսքով, կարող են փաստել այդ մասին:

Դիտարկմանը, թե հարևաններն արդեն ասել են այդ մասին, սակայն այստեղ խնդիրն այն է, որ «զավթված» տարածքը, շատ ապօրինաշինությունների օրինակով, կարող էր ապամոնտաժվել և վերադարձվել որպես  հանրային օգտագործման տարածք, Անդրանիկ Ավետիսյանն արձագանքեց, որ վարչական շրջանի ղեկավարն ապամոնտաժելու իրավասություն չունի:

«Վարչական շրջանի ղեկավարը կարող է ապամոնտաժել այն, ինչ նոր է իրականացվում` որպես ապօրինի շինություն, իսկ այն շինությունները, որոնք ունեն վաղեմություն՝ ապամոնտաժվում են քաղաքապետի որոշման հիման վրա»:

Անդրանիկ Ավետիսյանը հերքեց այն նկատառումները, թե տարածքի զավթումն ու ապօրինաշինությունը որևէ կերպ առնչվում են գործող ղեկավար Արման Բարխուդարյանի հետ:

«Նախագիծը, որով իրականացվում է բարեկարգում, չի պատվիրվել վարչական շրջանի ղեկավարի նշանակումից հետո՝ պատվիրվել է այդ նշանակումից առաջ: Բնականաբար, պարոն Բարխուդարյանը դրա հետ որևէ կերպ առնչություն ունենալ չէր կարող»,- ասաց Ավետիսյանը:

Նա նաև նշեց, որ իրենք նախատեսում են այդ տարածքը ևս բարեկարգել:

«Ցանկապատը, ապօրինությունները պետք է ապամոնտաժվեն: Կպատրաստվի նախագիծ և կներկայացնենք քաղաքապետարան, կլինի քաղաքապետի որոշում, որից հետո նոր կապամոնտաժվի ցանկապատն ու ցանկապատի ներսում գտնվող մետաղական կրպակը»:

Արձագանքելով բնակիչների ահազանգի հետ կապված խնդրի մեկ այլ կողմի, որ ապօրինի կառուցապատողը տարածքում շինություն է իրականացնում և, ըստ որոշ տվյալների, նպատակ ունի տեղադրել ավտոտնակ, վարչական շրջանի ղեկավարի տեղակալն ընդգծեց, որ հիշյալ տարածքում այս պահին ապօրինաշինություն տեղի չի ունենում:

«Ցանկապատի ներսում այս պահին որևէ կառուցապատում չի իրականացվում: Ես Ձեզ վստահեցնում եմ, Ձեր հոդվածից հետո ամեն օր մեր քաղաքաշինության և հողօգտագործման բաժնի աշխատակիցներին ուղարկում եմ այդտեղ, որ վերահասկեն»,- ասաց Անդրանիկ Ավետիսյանը՝ վստահեցնելով, որ խոսել են նաև տեղում բարեկարգում իրականացնող շինարարների հետ, որպեսզի ուշադիր լինեն:

NEWSPRESS.am-ի տեղեկություններով՝ բնակիչներն այժմ ստորագրահավաք են իրականացնում՝ վերոհիշյալ «զավթված» տարածքը ապամոնտաժելու համար:

«Մենք միայն ուրախ կլինենք: Դա մեզ կօգնի, որ մեր գործողություններն ավելի արագացնենք»,- ասաց մեր զրուցակիցը:

Նա նաև հավելեց, որ եթե անգամ չլիներ ստորագրահավաք՝ միևնույնն է, ապամոնտաժման նախագիծը ներկայացվելու էր քաղաքապետարան, իսկ այս դեպքում բնակիչների ստորագրահավաքը պարզապես արագ ընթացք կտա գործին:

Ավելին՝ Անդրանիկ Ավետիսյանը վստահ է, որ ապօրինի կառուցապատողի կողմից կլինի, այսպես ասած, «դիմադրություն», իսկ բնակիչների բողոքն ու ստորագրահավաքը հաշվի առնելով ի վերջո ապամոնտաժում կիրականացվի:

Արմինե Մկրտումյան