Թուրքիան ՀՀ-ի առաջ կարևոր քաղաքական պահանջներ է դնում սահմանը բացելու համար. Արթուր Խաչատրյան

Ցեղասպանության ուրացում, Ադրբեջանի ինքնիշխանությունն Արցախի նկատմամբ ճանաչում, և իհարկե՝ ճանապարհ ասեմ, միջանցք, թե հաղորդակցման ճանապարհ, նրանք ցանկանում են ՀՀ-ի տարածքով, Բոսֆորից մինչև Չինաստան թուրքախոս պետությունների միջև ցամաքային կապ ապահովել: Այս մասին ԱԺ-ում լրագրողների հետ զրույցում ասաց «Հայաստան» խմբակցության պատգամավոր Արթուր Խաչատրյանը՝  խոսելով Թուրքիայի կողմից ՀՀ-ի առաջ կարևոր քաղաքական պահանջեր դնելու մասին: 

Նրա խոսքով՝ ոչինչ չի փոխվել, ուստի Թուրքիան պատրաստ է կիրառել, թե՛ նախկին, թե՛ ներկա ճնշումները: 

Խոսելով «Նեմեսիս» արձանի տեղադրման մասին՝ Խաչատրյանը նշեց, որ ողջունում է այդ քայլը՝ այն համարելով ճիշտ:

«Իշխանությունների և Փաշինյանի հայտարարությունը, որ այդքան էլ ճիշտ բան չի եղել՝ դատապարտում եմ: Դա իրենց պարտվողական և Թուրքիայի առաջ ծնկելու շարունակական քաղաքականությունն է: Նրանք պետք է հասկանան, որ ցանկացած զիջում Թուրքիային և Ադրբեջանին, բերում է նորանոր պահանջների: Եթե նախկինում թուրքերն ասում էին՝ 5 շրջան, ապա հիմա ասում են՝ Արցախը մոռացեք, խոսում են «Զանգեզուրի» մասին, իրենց այսպես կոչված փախստականների վերադարձի մասին, մինչդեռ մարդիկ իրենց տները վաճառել և գնացել են առոք-փառոք Բաքվում ապրում են: Պարզ ու կոնկրետ օրինակ բերեմ: Տեսեք, ասում էին՝ Կաշենի հանքը փակեք, ճանապարհը կբացենք: Հանքը փակեցին, բայց ճանապարհը չբացեցին: Հաջորդը՝ Ռուբեն Վարդանյանին պաշտոնազրկեք, կբացենք ճանապարհը: Չեղավ, ոչ... Ցանկացած պահանջի առաջ ընկրկելը բերում է թուրքերի կողմից ավելի լկտի պահանջների»,-նշեց Խաչատրյանը: