Հայկական կողմի՝ որպես «թույլ խաղացողի» դիրքորոշումը բանակցություններում խթանում է թուրք-ադրբեջանական տանդեմին․ Արման Աբովյան

Հերթական սրացումը Սոթքի (Գեղարքունիքի մարզ) շրջանում ոչ միայն կանխատեսելի էր, այլև, ըստ էության, անխուսափելի: Այս մասին գրել է նախկին պատգամավոր Արման Աբովյանը։ 

«Թուրք-ադրբեջանական տանդեմը հայ-ադրբեջանական, այսպես կոչված, «բանակցությունների» շուրջ, վարել, վարում և վարելու է իր քաղաքականությունը բացառապես հայկական կողմի վրա ճնշում գործադրելու ուղղությամբ, քանի որ «խաղաղության պայմանագիրը» ադրբեջանական մեկնաբանությամբ ենթադրում է Հայաստանի «թավշյա իշխանությունների» կողմից այնպիսի զիջումներ, որոնք, ըստ էության, հարցականի տակ կդնեն Հայաստանի և Արցախի գոյությունը։ 

Հայաստանի իշխանությունների կողմից իրերի իրական վիճակի համառ անտեսումը, հերթական և, ցավոք, ոչ վերջին սրացման պատճառն է։ Հայկական կողմի՝ որպես «թույլ խաղացողի» դիրքորոշումը բանակցություններում, ըստ էության, խթանում է թուրք-ադրբեջանական տանդեմին` մշտական ռազմական էսկալացիայի գեներացման։ 
Իսկ միջազգային հանրությունն, ըստ էության, զբաղվում է ոչ թե բանակցություններով, այլ բացառապես իր շահերն է սպասարկում` հայկական կողմի արմատական շահերի հաշվին։ 

Ինչպե՞ս։ Նվազագույնը՝ վարելով թուրք-ադրբեջանական ագրեսորի նկատմամբ «նուրբ հանդարտեցնելու» քաղաքականություն։ 

Ցավոք, նույն դիրքորոշումն ունի նաև հայկական կողմը։ Ագրեսորին արված անընդհատ զիջումների գնով` խաղաղության հասնելու Հայաստանի իշխանությունների քաղաքականությունը, ինչպես և սպասվում էր, բերեց միայն նոր կորուստներ և նոր զոհեր։ 

Ցավոք, գործընթացները կզարգանան մեզ համար բացասական ձևով, քանի որ չնայած իրերի ակնհայտ դրությանը, հայկական կողմը համառորեն շարունակում է անտեսել ողջախոհությունը և շարունակելու է ագրեսորին հանդարտեցնելու քաղաքականություն վարել»,- գրել է Աբովյանը։