Ադրբեջանում ոչ թե 33, այլ հավելյալ 80 գերի ունենք. յուրաքանչյուր դեպքի վերաբերյալ կա ստուգելի նկարագրություն. Սահակյան

Նախկին ՄԻՊ Արման Թաթոյանն ու փաստաբան Սիրանուշ Սահակյանը վստահեցնում են՝ գերիների հետ կապված իրենք ներկայացնում են ոչ թե պարզապես թվեր, այլ հստակ փաստեր, որոնք հնարավոր է ստուգել:

Սիրանուշ Սահակյանը, լրագրողների հետ զրույցում, նշեց, որ իշխանությունների համար ավելի հեշտ է փոխհարաբերվել Ադրբեջանի և Թուրքիայի իշխանությունների հետ և խոսել նրանց պաշտոնականացված թվերով, քան իրական պատկերը ներկայացնել:

«Հայկական կողմի բացահայտումները և տվյալները անտեսվում են: Այստեղ միասնականություն կա Ադրբեջանի կողմից ներկայացված թվերի առնչությամբ»,- ասաց Սիրանուշ Սահակյանը:

Նա նկատում է, որ Հայաստանում գործող, նույնիսկ ՀՀ-ից դուրս գործող միջազգային իրավապաշտպանները, Հայաստանի քննչական մարմիններն արձանագրել և բացահայտել են գերեվարման ավելի մեծաքանակ դեպքեր, քան պաշտոնականացվել է Ադրբեջանի կողմից։ 

«Որպես աղբյուր, պետք է օգտագործվեին հայկական, ոչ թե ադրբեջանական աղբյուրները: 33-ը պաշտոնականացված թիվն է, իսկ մենք խոսել ենք եւ շարունակում ենք խոսել հավելյալ 80 դեպքի մասին: Ընդ որում, այդ 80 դեպքի վերաբերյալ նաև տեղեկություններ են տվել միջազգային կառույցներին: Այսինքն` սա մեզ համար ոչ թե վերացական թիվ է, այլ յուրաքանչյուր դեպքի վերաբերյալ կա հստակ նկարագրություն, ինչը ստուգելի է»,– ընդգծեց իրավապաշտպանը։