Պուտինից փրկություն է ակնկալում

Բրյուսելում Արցախը Ադրբեջանին տալու պայմանավորվածություն ձեռք բերելուց հետո Հայաստանի վարչապետ Նիկոլ Փաշինյանը պատրաստվում է ոչ թե այդ պայմանավորվածությունը հետ կանչել Մոսկվայում, այլ փրկել Հայաստանը մասնատվելուց։

«Ռուսական կողմից ստացել ենք առաջարկ ՌԴ նախագահի միջնորդությամբ բարձրագույն մակարդակով եռակողմ հանդիպում անցկացնել Մոսկվայում մայիսի 25-ին։ Ընդունել ենք այդ առաջարկը։ Ֆրանսիայի նախագահ Էմանուել Մակրոնի և Գերմանիայի Կանցլեր Օլաֆ Շոլցի մասնակցությամբ հնգակողմ հանդիպում էլ նախատեսվում է հունիսի 1-ին Քիշնևում Եվրոպական քաղաքական համայնքի երկրորդ գագաթաժողովի շրջանակներում։ Նման հնգակողմ հանդիպում նախատեսված է նաև հոկտեմբերին Գրանադայում»,-այսօր Կառավարության նիստի ժամանակ ասել է վարչապետ Փաշինյանը։

Վաշինգտոնում 4 օր տևած բանակցություններից հետո Նիկոլ Փաշինյանը Բրյուսելում, Ռեյկյավիկում, այսօր էլ Կառավարության նիստում հայտարարեց, որ Հայաստանը ճանաչում է Ադրբեջանի տարածքային ամբողջականությոնը 86 600 քառակուսի կիլոմետրով։ Ըստ նրա, դա կարևոր քայլ է դեպի խաղաղության պայմանագիր։

Ակնհայտ է, որ Արցախը Ադրբեջանի տարածքի մաս ճանաչելուց հետո Մոսկվայում, Քիշնևում նախատեսված հանդիպումների օրակարգում Արցախի հարցը չկա։ Հայաստանի իշխանության համար այս թեման փակ է և պետք չէ Արցախի հարցում հույս փայփայել։

Անիմաստ է սպասել արցախանպաստ քայլ, քանի որ Փաշինյանին հետքայլ անելու շանս որևէ մեկը թույլ չի տա։

Պետք է հստակ հասկանալ, որ հիմա Մոսկվայում և աշխարհի այլ մայրաքաղաքաներում քննարկվում է Հայաստանի լինել-չլինելու հարցը։ Չնայած Ադրբեջանի ղեկավարը բանավոր համաձայնություն է տվել ճանաչել Հայաստանի 29 800 քառակուսի կիլոմետր տարածքը, բայց Փաշինյանը հաշվի է առել նոյեմբերի 9-ի եռակողմ հայտարարության կետերը Ադրբեջանի ոտնահարման նախադեպը՝ հիմա փորձում է Պուտինի, Միշելի, Բլինքենի, Շոլցի միջոցով կանխել Հայաստանի մասնատումը։

Վարչապետ Փաշինյանը Պուտինի միջնորդությամբ մայիսի 25-ին Ալիևի հետ հանդիպելով փորձելու է փրկել Հայաստանի տարածքային ամբողջականությունը և հույս է կապում ռազմավարական դաշնակցի հետ։

Հարց է, թե Հայաստանը աշխարհաքաղաքական վեկտորի փոփոխության տանող Փաշինյանի խնդրանքը որքանո՞վ կկարևորվի Պուտինի համար։

Այս հարցի պատասխանը առավել կարևոր է դառնում երեկ Ռուսաստանի արտգործանախար Սերգեյ Լավրովի հերթական մեղադրանքներից հետ։

Լավրովը շատ ուղիղ հայերին մեղադրեց ռուսներին դուրս քշելու ծրագրում ներքաշվելու մեջ։

Նման հայտարարաությունից հետո պարզ է, որ զուր է Ռուսաստանի ղեկավարից սպասել հայանպաստ քայլ կամ որոշում։ Չի բացառվում, որ Մոսկվայից Փաշինյանը վերադառնա դատարկաձեռն, իսկ Ալիևը՝ պարգև ստացած բեռով։

                                                     NEWSPRESS.am