Կամ Արցախը թող ինքնուրույն լուծի իր հարցերը, կամ հարգի ՀՀ իշխանություններին. Վիգեն Խաչատրյան

Լաչինի հարցը հետևյալն է, եթե կողմերը պարտավորվել են ապահովել անխափան կապ Հայաստան-Արցախ, ընդ որում՝ դրա երաշխավորը Ռուսաստանն է, որի թույլ է տրվել մտցնել խաղաղապահ զորքեր, որպեսզի Ադրբեջանի իրավունքները սահմանափակվեն։ Մենք բազմիցս ասել ենք, որ միջազգային ուժերին փաստահավաք խումբ է պետք, որն ասի՝ կա՞ արդյոք առիթ կասկածելու՝ այդ ճանապարհն ըստ նպատակի օգտագործո՞ւմ են, թե՞ ոչ։ Այս մասին լրագրողների հետ զրույցում ասաց ՔՊ-ական պատգամավոր Վիգեն Խաչատրյանը։

Նրա խոսքով՝ ռուսներն իրենց պարտականությունները չեն կատարում, չեն ասում՝ այս անցակետն այստեղ իրավունք չունեք դնել։

«Փաստահավաք առաքելության գալու համար պետք է նաև Ռուսաստանի և Ադրբեջանի համաձայնությունը։ Հիմա, եթե Ռուսաստանը նման խնդրով դիմի՝ իհարկե կընդառաջեն։ Եթե Ռուսաստանը չի ուզում, ապա պետք է ասի, որ ես չեմ ուզում այդ պարտականությունը կատարեմ։ Եթե չի կարողանում, ապա պետք է ասի՝ ինձ օգնեք։ Հիմա ես չեմ հասկանում, թե որ տարբերակն է, չի ուզո՞ւմ, թե՞ չի կարողանում։ Երկու դեպքում էլ՝ լռում է։ Վլադիմիր Պուտինն ասել է, որ Հայաստանը գնացել և Պրահայում ընդունել է Ադրբեջանի սուվերենությունը Ղարաբաղի նկատմամբ։ Դա ասում է մի մարդ, որը մինչև այդ պնդում էր, որ Ղարաբաղը և հարակից տարածքները եղել են ու կմնան Ադրբեջանի մաս։ Դա ասում է մի մարդ, որի ԱԳ նախարարը պնդում է, որ ղարաբաղցիները պետք է ունենա Կոսովոյի և Սերբիայի իրավունքները։ Այսինքն՝ պիտի ունենան հայերեն խոսել»,- նշեց Խաչատրյանը և հավելեց, թե այսքանից հետո ինչպես լուրջ վերաբերվի այդ մարդկանց հայտարարություններին։ 

Նրա խոսքով՝ փորձը ցույց է տվել, որ, երբ Ղարաբաղի իշխանությունները համագործակցել են Հայաստանի իշխանությունների հետ, մենք լավ արդյունքներ ենք ունեցել, իսկ երբ հակադրվել են՝ առաջացել էին պրոբլեմներ։ Լուծումը գտնվել էր 1997թ․-ին։ 

«Եթե Հայաստանի իշխանությունները վճիռներ են կայացնում, ապա նրանք պետք է հասկանան դրա պատճառները և չհակադրվեն։ Եթե չեն կարող օգնել, ապա գոնե թող չխանգարեն։ Կամ Արցախը թող ինքնուրույն լուծի իր հարցերը, կամ հարգի ՀՀ իշխանություններին։ Այն, ինչ կատարվում է Արցախում շատ վտանգավոր է։ Չի կարելի, որ Ղարաբաղի ԱԺ նախագահը, պատգամավորները գնահատականներ տան Հայաստանին։ Մենք իրենց օգնում ենք»,- նշեց Խաչատրյանը։