Այո՛, իմ նշած 86 600 քառ․ կմ տարածքով Ադրբեջանը ներառում է նաև Լեռնային Ղարաբաղը․ Նիկոլ Փաշինյան

Ադրբեջանի 86.600 քառ․ կմ տարածքը ներառում է նաև Լեռնային Ղարաբաղը, բայց նաև պետք է արձանագրել, որ մենք ասում ենք՝ ԼՂ-ի հայության իրավունքների և անվտանգության հարցը պետք է քննարկվի Բաքու-Ստեփանակերտ ֆորմատով։ Այս մասին այսօր կայացած ասուլիսի ժամանակ հայտարարեց Նիկոլ Փաշինյանը, անդրադառնալով այն հարցեին, որ, եթե Հայաստանը ճանաչում է Ադրբեջանի տարածքային ամբողջականությունը՝ 86.600 քառ․ կմ, ապա արդյոք դրա մեջ մտնո՞ւմ է նաև Լեռնային Ղարաբաղը։ 

Փաշինյանից լրագրողները պահանջեցին ուղիղ պատասխանել՝ արդյոք ՀՀ կառավարությունը համարո՞ւմ է ԼՂ-ն Ադրբեջանի մաս։

Փաշինյանն ի պատասխան նշեց․ «ՀՀ այսօրվա կառավարությունն ինչ ասի-չասի, ՀՀ բոլոր կառավարությունները ճանաչել են Ադրբեջանի տարածքային ամբողջականությունը։ Ես ասել եմ, որ ավելի եմ կոնկրետացրել և ավելի կոնկրետ դժվար եմ պատկերացնում, թե ինչպես կարող եմ ասել։ Ադրբեջանի 86.600 քառ․ կմ տարածքային ամբողջականությունը ՀՀ-ն պատրաստ է ճանաչել, և մեր ընկալմամբ, Ադրեբեջանը պատրաստ է ճանաչել ՀՀ-ի 29.800 քառ․ կմ տարածքային ամբողջականությունը։ Եթե մենք Ադրբեջանի հետ իրար ճիշտ ենք հասկանում, ապա ՀՀ-ն, այո՛, ճանաչում է Ադրբեջանի 86 600 քառ․ կմ տարածքային ամբողջականությունն, այն ընբռմամբ, որ Ադրբեջանն էլ ճանաչում է 29.800 քառ․ կմ տարածքը։ ԼՂ-ի հայության իրավունքների և անվտանգության հարցը պետք է քննարկվի Ստեփանակերտ-Բաքու երկխոսության միջոցով։ Եվ ինչպես իմ բացման խոսքում ասացի, մենք կարևոր ենք համարում, այդ բանակցությունների միջազգային երաշխիքների ստեղծումը։ Նկատի ունեմ, օրինակ, որ ԼՂ-ի հայության իրավունքների և անվտանգության հարցն ուղղակի մոռացության մատնվել, և Ադրբեջանը շարունակել է ուժային լծակի գործադրմամբ ԼՂ-ի հայության էթնիկ զտման և ցեղասպանության քաղաքականությունը։ Մենք կարևոր ենք համարում, որ լինեն երաշխիքներ, որ այդ քաղաքականությունը չի շարունակվելու»։