Մեր տղաների հետ Աշոտին համեմատելով` արժեզրկում են նրանց. մեր որդիների անունը կհիշվի որպես հերոս, Աշոտիկինը` հերոսի մոր նկատմամբ ցուցմունք տվող. զոհվածի հայր

«Իր որդին չի կարող հերոսների հետ համեմատվել»։ Այս մասին կառավարության դիմաց լրագրողներին ասաց 44–օրյա պատերազմում զոհված Մխիթար Գալեյանի հայրը՝ Գարիկ Գալեյանը՝ արձագանքելով Փաշինյանի հայտարարությանը, թե` իր որդի Աշոտը հերոս է։

«Բոլորս քաջ տեղյակ ենք, թե քանի տղու են կոտորել, որ Աշոտիկին հանել են ռիսկային իրավիճակից, որտեղ որ գտնվել էր։ ԱԱԾ ցանկացած աշխատակից պատրաստ էր, որ փամփուշտն ու ռումբն իր գլխին ընկներ, բայց Աշոտիկի վրա չընկներ, քանի որ նրանց ընտանիքները պատանդ էին Փաշինյանի մոտ»,- ասաց Գալեյանը։

Մեկ այլ զոհված զինծառայողի` Հակոբ Ռոստոմյանի հայրն էլ՝ Արա Ռոստոմյանը, նկատեց, որ Աշոտի կերպարը փորձում են այլ կերպ ներկայացնել։

«Բոլորն էլ տեսել են, թե ինչ վիճակում է Աշոտիկը քայլում փողոցում, լուրեր են պտտվում, որ ինքն առանձին է ապրում։ Իրենք ուզում են մեր տղաներին համեմատեն իրենց տղայի հետ, ոչ թե իրենց տղային բարձրացնեն, այլ մեր տղաներին արժեզրկեն։ Ուզում են մեր տղաներին նսեմացնեն։ Չեն կարողանալու։ Քանի կանք, մեր տղաներն ամենաբարձր դիրքերում են լինելու ու հանրությունն այսօր միգուցե թմբիրի մեջ է, բայց անցնելու է ժամանակ, մեր տղաների անունը սերնդեսերունդ է հիշվելու, իսկ Աշոտիկի անունը կհիշվի հերոսին մոր նկատմամբ ցուցմունք տված»,- ասաց զոհվածի հայրը։