Երևանի N1 արհեստագործական պետական ուսումնարանի ուսանողները ներկայացրեցին իրենց ավարտական աշխատանքները (լուսանկարներ)

Երևանի N1 արհեստագործական պետական ուսումնարանի դահլիճը վերածվել էր նորաձևության հարթակի: «Վարսավիրական արվեստ, զարդային դիմահարդարում» և «Կարի արտադրության տեխնոլոգիա»‎ բաժինների ուսանողները ներկայացան իրենց ավարտական աշխատանքներով:

«Վարսավիրական արվեստ և զարդային դիմահարդարում» բաժնի 1-ին, 2-րդ և 3-րդ կուրսի ուսանողները յուրահատուկ կերպով ներկայացրեցին գեղեցիկ սանրվածքներ: Սանրվածքներն ամբողջացրեցին մոդելների կերպարներն ու հագուստները, որոնք յուրահատուկ, վիզուալ ճամփորդություն էին ներկաների համար՝ դեպի Հնդկաստան, Հունաստան, Իսպանիա, Ուկրաինա և այլ երկրներ:

Տարեվերջյան ցուցադրության երկրորդ հատվածում իրենց աշխատանքները ներկայացրեցին «Կարի արտադրության տեխնոլոգիա»‎ բաժնի «Դերձակ»‎ որակավորմամբ բոլոր ուսանողները։

Առաջին կուրսի ուսանողները ներկայացան իրենց կարած, նկարազարդած էկո-պայուսակմերով և ուսումնարանի բոլոր բաժինները ներկայացնող գոբելենագործ լոգոներով։

Երկրորդ կուրսի ուսանողները ներկայացան իրենց կարած, ասեղնագործած դեկորատիվ բարձերով, տաբատներով և վերնաշապիկներով։

Դե իսկ երրորդ՝ ավարտական կուրսի ուսանողները, ներկայացան կիսաշրջազգեստներով, շրջազգեստներով, պիջակներով, մանկական շրջազգեստներով։ Ցուցադրության վերջում ներկայացրեցին նաև լավագույն ուսանողների դիպլոմային աշխատանքները՝ տարազները։

Տարազները կարված էին Արցախ-Սյունիք, Վան-Վասպուրական և Կարնո տարածաշրջանի ազգային տարազների մոտիվներով, սակայն յուրովի, չկրկնվող ասեղնագործ զարդանախշերով։ Սա ևս մեկ վիզուալ ճանփորդություն էր դեպի մեր արմատներ:

Ի դեպ, եթե դու ևս ցանկանում ես սովորել, տիրապետել նման աշխատանքներ կատարելուն, ապա հետևիր ուսումնարանի պաշտոնական էջին, որպեսզի տեղյակ լինես ընդունելության կարգին և ժամանակացույցին: Էջին հետևելով կարող ես ծանոթանալ ուսումնարանի այլ բաժիններին ևս:

 Գայանե Մելիքյան