Չկա որևէ երաշխիք, որ ադրբեջանական պահանջատիրությունը չի աճի, հատկապես, երբ ՀՀ-ում այս իշխանություններն են. Աբրահամյան

Արցախի հարցով գործընթացի կամ ներկայումս տեղի ունեցող այս պրոցեսների հիմքում Նիկոլ Փաշինյանի հայտարարությունն  է այն մասին, որ ՀՀ իշխանությունը, ՀՀ կառավարությունը և ինքը՝ Նիկոլ Փաշինյանը պատրաստ է ճանաչել Արցախն Ադրբեջանի կազմում: Մնացածն արդեն հետևանքներ են, որոնք այսօր մենք քննարկում ենք, որովհետև կոնկրետ միջանցքի հետ կապված կամ «Զանգեզուրի միջանցք»-ի հետ կապված իրավիճակը հետևյալն է՝ Ադրբեջանը հայտարարել է, որ իր մոտեցումն այն է, որ ՀՀ-ն Արցախին կապող և ՀՀ-ի միջոցով Ադրբեջանը դեպի Նախիջևանին կապով երթուղիները պետք է ունենան միևնույն ռեժիմները: Այս մասին ԱԺ-ում ճեպազրույցի ժամանակ ասաց «Պատիվ ունեմ» խմբակցության պատգամավոր Տիգրան Աբրահամյանը: 

Նրա խոսքով՝ այս փուլում ադրբեջանական անցակետի տեղակայումն այդ միջանցքում չի բացառում, որ իրականացվել է՝ հետագայում դա թանկ ծախելու և լրացուցիչ տարածքային հավակնությունները բավարարելու առումով: 

«Դժվար է ասել, թե իրականության մեջ պրոցեսն ինչ ձևով կընթանա: Այդտեղ հրապարակային ձևով նաև ՀՀ-ի իշխանությունը ներկայացնող Նիկոլ Փաշինյանն ասում էր, որ նման պայմանավորվածություններ չունեն: Ակնհայտորեն միջանցքի հետ կապված կա նոյեմբերի 9-ի փաստաթուղթ, որը հստակ սահմանում է, թե որտեղ կա միջանցք հասկացությունը և ինչ է իրենից ենթադրում ռեգիոնալ ապաշրջափակում ասվածը։ Խնդիրն այն է, որ Ադրբեջանը վաղուց շեղվել է ոչ միայն 2020թ.-ի նոյեմբերի 9-ի այդ պայմանավորվածություններից, այլ հանդես է եկել նոր տարածքային պահանջներով, որոնց մի մասը բավարարվել է խաղաղ ճանապարհով, մի մասն էլ՝ ագրեսիայի հետևանքով: Չկա որևէ երաշխիք, որ ադրբեջանական պահանջատիրությունը չի աճի, հատկապես երբ ՀՀ-ում այս իշխանություններն են»,- նշեց Աբրահամյանը: